СТАТИСТИКА Од вкупно новозаразените 40 лица со КОВИД19 во изминатото деноноќие, 26 се од Скопје, а 10 од Тетово. Само во последните пет дена, во овие два града се потврдени вкупно 96 случаи, 72 во Скопје и 24 во Тетово.
Од Министерството за здравсто за МИА информираат дека согласно податоците од Институтот за јавно здравје (ИЈЗ), од 26 новозаболени во Скопје, деветмина се од општина Аеродром, шест од Чаир, четворица од Сарај, по двајца во Центар и во Бутел по еден во Кисела Вода, Гази Баба и Петровец.
*
Во изминатите 24 часа направени се 549 тестирања, а регистрирани се 40 нови случаи на КОВИД-19.
– Скопје 26, Куманово 1, Прилеп 1, Тетово 10, Велес 1 и Битола 1.
Досега во земјата се направени вкупно 23.316 тестирања на КОВИД -19. Од вкупниот број направени тестови во изминатото деноноќие 209 теста се во рамките на скринингот. Денеска е потврден 1 позитивен случај-вработен во градинка во Скопје.
Денеска Институтот за јавно здравје регистрира 11 оздравени пациенти.
– Скопје 2, Штип 1, Прилеп 4, Велес 2 и Кочани 2.
*
СОРАБОТКА Претседателот на Република Северна Македонија Стево Пендаровски денеска имал телефонски разговор со Албин Курти, вршител на должноста премиер на Република Косово. Во разговорот, на барање на косовската страна, соопшти кабинетот на шефот на државата, Пендаровски и Курти размениле мислења и информации поврзани со билатералните односи меѓу двете соседни земји, како и за актуелните политички состојби во регионот на Западен Балкан.
*
ПРАВДА Изградена е најголемата судница во државата, во склоп на затворот „Идризово“, со поддршка на Европската Унија во рамки на ИПА акциската програма „Поддршка на Секторот Правда“. Целиот овој дел од затворот се простира на 1.000 м2 и има капацитет за вкупно околу 120 лица.
*
ОДЛУКА Утре Владата ќе одлучи каков полициски час ќе има викендов. Се вршат консултации, досега се почитуваа препораките, ние ги следиме експертските мислења. Ќе мора да одиме кон олабавување на мерките, но тоа значи почитување на другите нерестриктивни мерки. Но, тие мерки не се почитуваат, не се носат маски, не се почитува растојание. Ако сакаме да имаме намалување на мерките, мора да се почитуваат препораките.
Ова го изјави министерот за информатичко општество и администрација, Дамјан Манчевски на вечерашното гостувањето на ТВ 24, потенцирајќи дека олабавувањето на мерките е правопропорционално со почитување на препораките.
*
ИЗБОРИ Парламентарните избори треба да се одржат кон крајот на јуни, поточно на 21 јуни, а нивното пролонгирање за наесен би преставувал преголем ризик за државата, смета министерот за информатичко општество и потпретседател на СДСМ, Дамјан Манчевски.
А. Петровска
