ИЗБОРИ Датумот 5 јули станува се поизвесен за одржување на парламентсрните избори. Освен ВМРО-ДПМНЕ, сите други поголеми партии изразиле подготвеност да го прифатат овој датум ако Комисијата за заразни болести даде согласност.
Од Алијансата за Албанците повторуваат дека според нив најдобар датум е 26 јули, но на нашето прашање дали би го прифатиле 5 јули, одговорија позитивно доколку се постигне консензус.
Иста подготвеност изразила и партијата Алтернатива, другиот партнер на коалицијата со Алијансата за Албанците. За оваа партија е прифатлив датумот 5 јули, ако се елиминира стравот од пандемијата.
*
ДИЈАЛОГ СДСМ сака брзи избори на кои ќе учествуваат сите политички чинители, и ВМРО-ДПМНЕ, за да ги поразиме на изборите, истакна потпретседателот на СДСМ, Мухамед Зеќири во гостувањето во ТВ24.
Тој нагласи дека СДСМ нема отстапено од своите позиции, за одржување на избори по укинувањето на вонредната состојба, кога со почитување на уредбата на владата почнуваат да течат 22 дена до одржување на избори.
„Има комуникација меѓу СДСМ и ВМРО-ДПМНЕ и се надеваме дека ќе биде постигната согласност за заеднички датум за одржување на избори“, рече Зеќири.
*
ЧЛЕНСТВО ВО НАТО Американски воени авиони утре со прелет над Скопје ќе го поздрават членството на Република Северна Македонија во НАТО, информираат од Министерството за одбрана. Прелетот ќе се реализира околу 11:20 часот.
Два авиона на американското воено воздухопловство придружувани од два воени авиона на Република Грција, ќе извршат прелет над територијата на Република Северна Македонија. Прелетувањето ќе биде во чест на нашето членство во НАТО. Авионите ќе летаат долж реката Вардар, а ќе дојдат од правец на скопскиот аеродром, велат од МО.
*
ДИПЛОМАТИЈА Од Европската Комисија велат дека не може Северна Македонија вечно да функционира со техничка влада. Брисел би сакал да види напредок во партиските преговори, како попрецизен договор околу некаков временски рок кога би се одржале изборите.
*
МЕРКИ Министерот за економија Крешник Бектеши изјави дека согласно Законот за угостителска дејност нема одредба според која сопствениците, менаџерите и вработените во угостителските објекти имаат надлежност да ги легитимираат гостите. Министерството за економија ќе упати писмо до Комисијата за заразни болести за да се преиспита делот во протоколот за работа на угостителските објекти каде е пропишано колку лица може да се послужат на една маса и дали се од исто семејство или не.
*
РАЗГОВОР Министрите за надворешни работи на Србија и Северна Македонија, Ивица Дачиќ и Никола Димитров, денеска имале телефонски разговор за натамошното олеснување на рестриктивните мерки меѓу двете земји, како резултат на подобрената епидемиолошка состојба, соопштија од српското Министерство за надворешни работи.
