ВЕСТ НА ДЕНОТ
Избирачките места отворени во повеќе од 20 држави, веќе гласале над 82 милиони Американци
Во САД денеска се отворени гласачките места за претседателските избори, каде граѓаните избираат шеф на државата меѓу поранешниот републикански претседател Доналд Трамп и кандидатката на владејачките демократи, Камала Харис.
Повеќе од 82 милиони луѓе веќе гласаа.
Избирачките места се отворени во повеќе од 20 држави на истокот на САД, од вкупно 50 каде што ќе се отвораат постепено поради временската разлика.
ИЗЈАВА НА ДЕНОТ
Задолжително изучување на ромскиот јазик во сите основни и средни училишта, каде има мнозинство ученици од ромската заедница. Формирање на катедра на Универзитетот св. „Кирил и Методиј“ на кој ќе се предава ромскиот јазик и формирање на Институт во Скопје кој ќе го следи развивањето на истиот. Министерот за ресор, Шабан Салиу, по повод Меѓународниот ден на Ромскиот јазик, рече дека новата влада ќе се фокусира на зачувување на ромскиот јазик и идентитет.
РЕГИОН
Вучиќ предлага референдум: Нема да останам претседател ако ја немам поддршката од народот
Претседателот на Србија, Александар Вучиќ, во емисијата „Кирилица“ на телевизија „Хепи“ изјави дека оставката на министерот за градежништво, транспорт и инфраструктура, Горан Весиќ е чин на одговорност, но тој не го принудил на тоа.
СВЕТ
Иранската студентка Абоу Дариае стана синоним за слобода на жените, храброст, пркос и отпор
Храброста на иранската студентка (како што ја претставуваат на социјалните мрежи) Абоу Дариае го освои светот. И покрај репресијата во Иран и опасноста по нејзиниот живот, таа одлучи да му пркоси на режимот и да ја бара својата слобода и почитување на правата на жените, со тоа што во знак на протест против насилно наметнување на носење бурка, шеташе во долна облека.
ГРАЃАНСКА АКЦИЈА
СЛОБОДНА ЗОНА
„Не е исклучено да се соочиме со серија од предвремени избори, како во времето на Груевски. Тоа е веќе испробан рецепт за долговечност на еден режим, кој гледаме дека редовно го користат и други авторитарни властодршци во регионот и пошироко. За предвремени избори има услови веќе во октомври идната, 2025 година, заедно со локалните избори, а добар изговор за тоа му даваат и дел од неговите коалициски партнери, а и релевантната опозиција. Во меѓувреме, може да си игра со Лего коцкички, да се богати себе си и партијата, да прави реконструкции на владата, да ротира ресори и коалициски партнери. За секој проблем или неуспех, вината ќе ја префрлува на „предавниците“, на кои, како што вети од говорницата во Собранието, „ќе им влеземе и ќе им ставиме лисици“.
Мицкоски е типичен авторитарен властодржец. За него се добредојдени кризни состојби, поларизација и тензии. Етничките тензии и национализмот се основно гориво за ваква власт“, пишува Џабир Дерала во колумната „Популизам, национализам и политичка корупција: Формулата на Мицкоски“.
*
„Ние како медиумска куќа и индивидуалци одговараме како пред јавноста за секој изречен збор или постапка, така и пред сите применливи домашни и меѓународни закони што ја регулираат нашата работа. Очекуваме тој прост постулат како премиса за постоење на елементарна правна држава да биде применлив и за сите други граѓани на државата, вклучително и функционерите и нивните „свиркачи“, без разлика дали станува збор за правосудство или друга сфера на нашето општество. Не сакаме да веруваме во познатата изрека на еден поранешен премиер на Кралството Југославија на почетокот на 20 век, кој изјавил: „Законите се за противници“, пишува Мирослав Јовановиќ во колумната „Држ‘те го крадецот“.
Д. Муратов
