ВЕСТ НА ДЕНОТ
Бислимоски: Најголемите пекарски компании се законски обврзани да обезбедуваат струја на слободниот пазар
Претседателот на Регулаторната комисија за енергетика Марко Бислимоски, коментирајќи го ставот од претставници од пекарската индустрија дека тие во голем дел зависеле од домашното производство и оти со растот на цената на струјата ќе се зголеми и цената на лебот, порача дека големите пекарски компании се законски обврзани да обезбедуваат електрична енергија на слободниот пазар и оти не смеат да бидат снабдувани од ЕВН Хоум.
-Големите пекарски компании во државата, кои обезбедуваат најголем дел, односно над 90 проценти од потребите за леб, мора да одат на слободен пазар на електрична енергија. Тие никогаш не биле снабдувани од универзалниот снабдувач, рече Бислимовски, на новинарско прашање на прес-конференцијата за 32. Генерално собрание на регулаторите за вода од Европската Унија – WAREG, што се одржува во Скопје.
ИЗЈАВА НА ДЕНОТ
Контролата на партиите врз јавниот дискурс и потоа контролата на партиите врз јавните пари се врши со тоа што се фрла една тема пред јавноста и потоа ете, ние се занимаваме со симболи, со тоа кој каква изјава дал при преземање на функција а никој не разговара за тоа што се суштински прашања, порача Ивон Величковски во интервју за Слободен печат.
РЕГИОН
Европската комисија го усвои Предлог-буџетот на ЕУ за 2025 година, кој изнесува 199,7 милијарди евра, информира денеска извршниот потпретседател на ЕК задолжен за економија во интерес на луѓето, Валдис Домбровскис.
Како што јави дописникот на МИА од Брисел, од вкупните средства во Буџетот на ЕУ за следната година, 2,2 милијарди евра се наменети за Инструментот за претпристапна помош (ИПА III), а 500 милиони евра за Механизмот за реализација на Планот за раст на Западниот Балкан, како дел од ставката за поддршка на европските партнери и интересите на Унијата во светот.
СВЕТ
Актуелниот претседател на Европската народна партија (ЕПП), Манфред Вебер, повторно по четврти пат е избран за лидер на најголемата политичка групација во Европскиот парламент.
СЛОБОДНА ЗОНА
„Во име на „слободата на говор, слобода на изразување и нецензура“ му се извинувам на директорот на Канал 5, Иван Мирчевски за текстот: Случај Мирчевски, Канал 5: Груба инструментализација на телевизијата, притисок врз судот, едностраност, говор на омраза и лажни наративи, во кое според барањето за извинување кое го добив стои дека во текстот се изнесени клеветнички изјави кон Канал 5 и Мирчевски“, пишува Дехран Муратов во колумната „Им се извинувам на неалбанофобот Иван Мирчевски и Канал 5“.
*
„Генерално, како што стојат работите, политичките одлуки за тоа кој и каква влада ќе се формира во голема мера се одредуваат според бројките и процентите, а не според политичките идеи, платформи и вредности. Овој нумерички пристап се протега надвор од формирањето влада до повеќето аспекти на државното управување. Речиси сите процеси во државата зависат од односите меѓу етничките заедници. Во исто време, на овој критичен аспект од севкупниот живот на земјата му се пристапува бесчувствително, бирократски и, да бидам сосема директен, како „нужно зло“, пишува Џабир Дерала во колумната „Кога бројките стануваат неопходно зло: Масивните недостатоци во политичкиот систем“.
Д. Муратов
