ВЕСТ НА ДЕНОТ
Владата го назначи Боцевски за специјален претставник при унгарското претседателство со ЕУ
Владата на вчерашната седница го именува Ивица Боцевски за нејзин специјален претставник при унгарското претседателство со Советот на Европската Унија, а донесе и нови кадровски решенија на повеќе институции.
Промени има и во Културно – информативниот центар на Република Северна Македонија во Софија, Република Бугарија, КПД Затвор Скопје, Агенцијата за промоција и поддршка на туризмот, Службата за просторен и информативен систем, Дирекцијата за технолошки индустриски развојни зони, Дирекцијата за заштита и спасување и во Управа за електронско здравство.
ИЗЈАВА НА ДЕНОТ
ПИОСМ за ЦивилМедиа: Во тек е собраниска постапка за измени на Законот, покачувањето на пензии може да се очекува во октомври
„Почитувани, во одговор на вашиот мејл, ве известуваме дека во тек е постапка за изменување и дополнување на Законот за ПИО кој се однесува на линеарното покачување на пензии. По завршување на постапката и донесување на измената на Законот во Собрание на РСМ ќе може со сигурност да одговориме на мејлот. Имајќи го во предвид законското решение и праксата во работењето на Фондот на ПИОСМ линеарното покачување би се очекувало да биде во октомври месец“, одговорија од Фондот, на прашањето на ЦивилМедиа кога пензионерите може да го очекуваат покачувањето и што ја предизвикало забуната кај нив за да го очекуваат покачувањето со августовската пензија?
СВЕТ
Бројот на загинати во руското ракетирање на Лвив се зголеми на седум, меѓу кои и три деца
Русите го погодија Лвив со проектили. Се запалија станбени згради, оштетени се две училишта. Според последните информации кои ги соопшти Државната служба за вонредни состојби, бројот на загинати во вчерашниот рускиот ракетен напад врз Полтава се искачи на 50, додека бројот на повредени достигна 271. Во Лвив бројот на загинати во рускиот ракетен напад се зголеми на седум, објави на Телеграм градоначалникот на градот Андриј Садови
ГРАЃАНСКА АКЦИЈА
ПРАШАЊЕ НА ДЕНОТ: Дали пензионерите се измамени или недоволно информирани зошто не им се исплатени дополнителните 2.500 денари?
Пензионерите се збунети, дали ќе ги добијат парите во септември или во октомври? Дали ќе биде еднократно или секој месец ќе добиваат дополнително 2.500, а од март следната година пензијата ќе им се зголеми за 5000 денари? Цивил Медиа следејќи ја темата, го поставува прашањето дали пензионерите се измамени или недоволно информирани?
СЛОБОДНА ЗОНА
„Поддршката на СДСМ за иницијативата на Левица за интерпелација на претседателот на собранието Африм Гаши ја постави партијата повеќе десно и од ВМРО-ДПМНЕ и од ЗНАМ. Политичкото сојузништво со Левица е, најблаго речено, кусогледо. Но не само тоа. Било каква иницијатива на една ваква (ултра десна) Левица за еден било каков СДСМ треба да биде неприфатлива опција“, пишува Џабир Дерала во РАФАЛОТ „СДСМ свртување во десно: Политички сојузништва што водат кон пропаст“
„И ако е по она народната, „По утрото денот се познава“, црно им се пишува на работниците во наредниот период од владеењето на коалицијата на ВМРО-ДПМНЕ и премиерот Христијан Мицкоски со претставниците на крупниот капитал, ткн. газди, колку и таа да трае3, пишува Драган Мишев во „Олигарсите осоколени од новата власт, удрија по работниците“
Подготви: Б. Јордановска
