ВЕСТ НА ДЕНОТ: 20 години ЦИВИЛ, 20 години броба за човекови права и слободи!
Без коктели и забави, туку работно, како и секогаш, со конференции, јавни настапи и ангажирани мултимедијални културни настани, ЦИВИЛ ќе го одбележи јубилејот. Настаните на оваа организација, како и секогаш, се дестинација за сите свесни и активни граѓанки и граѓани кои имаат енергија, волја и потреба да се вклучат во справувањето со предизвиците во нашето општество и поддршката на демократските процеси и евроинтеграцијата.
ЦИВИЛ ги повикува сите свои членови, поддржувачи, соработници, граѓанки и граѓани заеднички во наредните две недели да бидат дел од активностите – една голема конференција на 29 ноември, посветена на граѓанското општество „Меѓу стремежите и реалноста“, панел дискусија „Рампа“ по повод 3 декември, Меѓународниот ден на лицата со посебни потреби, мултимедијален ангажиран Фестивал на слободата, на 10 декември, Меѓународниот ден на човековите права и низа други активности.
Трите деца вратени, ќе се бара компромисно решение за евентуална дислокација на Малиот групен дом во Визбегово
„Трите деца кои вчера беа префрлени во друг дом, веќе се вратени во Малиот групен дом во Визгебово. Засега нема никаква закана по нивниот живот“, изјави денеска министерката за труд и социјална политика, Мила Царовска.
Според неа, дали Домот ќе се дислоцира како што бараат дел од жителите во Визбегово, допрва ќе се одлучува, зашто дискусијата е во тек, но во секој случај, ќе се бара заедничко, компромисно решение. Во врска со забелешката на некои жители од Визбегово дека воспитувачите не се грижат доволно зашто доцна навечер децата излегувале од Домот и шетале низ населбата, Царовска е децидна.
„Малите групни домови не се затвор. Тие се од отворен тип. Овие деца се соочувале со социјални ризици со кои поголем дел од нас не се соочиле никогаш во животот. Службите не само што се присутни, туку се таму 24 часа“, изјави Царовска.
Буџетот за 2020. за опозицијата е предизборен популизам, за власта реален и развоен
Предлог буџетот на државата за следната година за кој денеска стартуваше расправа во матичната собраниска комисија, според опозициската ВМРО-ДПМНЕ, е нереален, неразвоен, само со социјална компонента и мерки кои се евтин предизборен популизам. Наспроти нивната оценка од парламентарното мнозинство оценија дека буџетската каса се заснова на реални проекти и ќе овозможи вложување во човечкиот капитал, поддршка на приватниот сектор, зголемување на потрошувачката со раст на платите и пензиите, реализација на инфраструктурни проекти.
Буџетот за наредната година ќе изнесува 3,615 милијарди евра. Капиталните инвестиции се проектирани на ниво од 23 милијарди денари, а 56 отсто од вкупните буџетски расходи се за области врз кои се потпира човечкиот капитал. Буџетските проекции се врз основа на предвиден раст за следната година од 3,8 отсто од БДП и дефицит од 2,3 отсто.
ФЛЕШ ВЕСТИ
Меѓународен ден за борба против насилството врз жените годинава се одбележува под мотото „Обојте го светот портокалово: Генерацијата еднаквост против силувањето“. Како и претходно и годинава Меѓународен ден ќе го означи отпочнувањето на 16 дена активизам што ќе заврши на 10 декември 2019 година, што е Меѓународен ден на човековите права.
Министерски форум за култура меѓу Кина и земјите од ЦИЕ денеска и утре во Скопје
Министерство за култура тврди дека не било најавено присуство на навивачка група во МНТ
Потпишан Меморандум помеѓу Владата на РСМ и Швајцарската агенција за развој и соработка за изборни реформи со цел да се зајакнат институциите кои спроведуваат фер и ефикасни изборни процеси, со фокус на внатрешно демократизирани политички партии, чии политики и изборни програми се ориентирани кон граѓаните и нивните потреби
Премиерот Зоран Заев денеска коментирајќи ги наводите во медиумите за вандалско однесување и оштетување на инвентарот на Македонскиот народен театар, што се случило во петокот по прославата на Денот на албанската азбука, изјави дека мора да има одговорност од организаторите и надомест на штета.
МИСЛА
На јавноста ѝ се обраќа соработник на децениски режим. На партија која како никогаш досега да не била на власт. Висок функционер на партија која во овие 28 години независност што тој во писмото ги проколнува, како да не владеела цели 16. Ни се обраќа сведок и соучесник во тоталитарното владеење кое земјава и каузата ја водеа во бездна, од корнер Зоран Иванов за „Забегана работа“
„Кодошилак, злоба и антидржавност“ за „Разбирливо е незадоволството, дури и лутината поради обезвластеноста на ВМРО-ДПМНЕ, сомнителниот партиски рејтинг; разбирлив е и различниот (опозициски) поглед врз нештата, немоќта, повредената суета, па и нетрпеливоста кон политичкиот конкурент“, колумна на Милан Банов.
Каде е „нултата точка“ на аферата „Рекет? добро утро со Сашо Орданоски: Ќе успее ли Обвинителството со ваков квалитет на докази да го убеди Судот во наводите од обвинението? Особено кога во сензационалната конструкција на целиот скандал треба доволно убедливо да се аргументира вмешаноста на Јанева? Едно патемно „Сè ќе биде О-Кеј“ и „уапсениот“ тросед ли се крунските докази? Во изминатите години, гледаме, Јанева од СЈО земала толку пари на име на редовни и дополнителни приходи, што таа би можела самата да опреми стоковна куќа за намештај – до троседот од Камчев ли ѝ дошло?!
Биљана Јордановска
во саработка со Маја Ивановска, Диана Тахири, Зоран Иванов, Сашо Орданоски и Милан Банов
