Вест на денот: Филип Рикер во Скопје
Вршителот на должност помошник државен секретар на САД за Европа и Евро-Азија, Филип Рикер, ја почна серијата разговори со претставници на власта и на опозицијата. Тој утрово оствари средба со шефот на дипломатијата Никола Димитров во МНР.
Според агендата, по средбата со Димитров треба да се сретне со премиерот Зоран Заев, со кого ќе одржат заедничка прес-конференција, и потоа ќе замине за Тетово на средба со лидерот на ДУИ, Али Ахмети. Предвидено е во текот на денот Рикер да се сретне и со претседателот на државата Стево Пендаровски, со претседателот на Собранието Талат Џафери и со други владини претставници, како и со пратениците од Независната пратеничка група од ВМРО-ДПМНЕ и Коалицијата „За подобра Македонија“.
На прес – конференцијата Рикер ја повика опозицијата да покаже конструктивност за законот за јавно обвинителство, со кој треба да се реши идниот статус на Специјалното јавно обвинителство и порача дека времето за политички игри веќе е поминато. Северна Македонија, како што нагласи, се движи напред во исполнување на повеќедецениските цели во врска со евроатланските интеграции – да стане НАТО-сојузник и да ги почне преговорите за членство во Европската Унија.
Заев: Ќе се најдеме во непријатна состојба ако не се донесе законот за ЈО
За премиерот Зоран Заев, посакувано решение за законот за Јавно обвинителство е да биде донесен со консензус со опозицијата, зашто во спротивно, државата ќе биде во непријатна состојба да се изнаоѓаат други можни решенија. Премиерот појасни дека посакуван начин значи, како и досега во последните месеци што покажа РСМ, низ дебата утврдување на законско решение кое што никако нема да дозволи да се нарушат црвените линии, а тоа е владеење на правото, гарантирање на иднината на СЈО, но и создавање на Лекс специјалис – законот за јавно обвинителство кое навистина ќе ја гарантира правната држава и владеење на правото.
Протоколот за НАТО ратификуван во Комитетот за надворешни работи на Сенатот на САД
Комитетот за надворешни работи на Сенатот на САД го ратификуваше Протоколот за прием на Северна Македонија во НАТО.
Ратификацијата на Протоколот заеднички на Фејсбук ја објавија министерот за надворешни работи Никола Димитров и помошникот државен секретар на САД за Европа и Евро-Азија, Филип Рикер, кој престојува во посета на земјава.
Флеш вести
Алтернатива ја предлага Фатиме Фетаи за шефица на новото обвинителство
„Сега, кога треба да се избира новото име за управување со новото Обвинителство за гонење на организиран криминал и висока корупција, ја предлагаме обвинителката Фатиме Фетаи да раководи со него“, велат од партијата Алтернатива на Африм Гаши.
Хан: Никој не смее да биде амнестиран поради неспособноста да се исполнат одредени рокови
Еврокомесарот Јоханес Хан нагласи дека сите политички чинители треба да ја имаат предвид иднината и интересите на граѓаните и државата и апелираше до политичките партии што побрзо да дојдат до решение за законот за јавно обвинителство.
Мементо
Скопје се сеќава на катастрофалниот земјотрес од 1963 година
Денеска се навршуваат 56 години од катастрофалниот земјотрес што го погоди Скопје.
Во земјотресот во 1963 година животот го загубија 1.070 луѓе, а 3.000 беа повредени. Во неговата обнова се вклучија голем број држави поради што Скопје уште е познат и како „Град на солидарноста“.
Скопје секоја година го одбележува овој ден со низа манифестации. Денеска, официјални делегации и претставници на институции ќе положат цвеќе на Споменикот на жртвите од земјотресот на градските гробишта во Бутел, а традиционалната крводарителска акција ќе се спроведе од 9 до 17 часот во Домот на хуманитарни организации „Даре Џамбаз“.
Д. Тахири
