ВЕСТ НА ДЕНОТ: Владата попладнево одлучува за мерките за заштита од КОВИД-19
Владата од 16 часот ќе одржи седница на која се очекуваат одлуки за мерките и препораките за спречување на ширењето на КОВИД-19. Владината прес-служба најави соопштение по завршувањето на седницата.
Денеска заседаваше Комисијата за заразни болести, која ги анализира тековните состојби со ширењето на вирусот, а меѓу темите за расправа беа можностите за олабавување на мерките, за отворање на угостителските објекти, на градинките и евентуалното намалување на полицискиот час.
Според претходните препораки на Комисијата, треба да се донесе одлука по кои критериуми ќе се отворат кафеаните, односно да има ограничен број на посетители, растојание помеѓу масите или можност да функционира само терасата или летната бавча на објектите.
ВОНРЕДНА СОСТОЈБА:
Денеска Институтот за јавно здравје регистрира 14 оздравени пациенти: Скопје 3 и Тетово 11, а во последните 24 часа направени се 314 тестирања, и регистрирани се 16 нови случаи на КОВИД-19. По градови во: Скопје 9, Штип 5, Струга 1 и Гостивар 1. Регистрирани се и три смртни случаи: пациентка од Велес (78), хоспитализирана на 14 мај. Во ГОБ „8 септември“ починал пациент од Тетово (84), примен во болница на 20 мај и пациентка од Скопје (76) примена на 19 мај.
*
Според информациите од Центарот за јавно здравје во Велес во изминатите 24 часа нема ново регистрирани заболени од КОВИД-19, а со тоа во Велес петти ден нема регистрирано ново заболени – од 21-ви мај кога беа 127, од кои денеска активни се 40.
*
Нови пет случаи на заразени со коронавирус во Штип, од кои четири се текстилни работнички од штипската конфекција, во која во изминатите два дена беа регистрираа две заразени работнички, со што во оваа фабрика вкупниот број на заболени изнесува шест лица. Градоначалникот на Општина Штип, Благој Бочварски денеска рече дека од страна на сопственикот на конфекцијата е информиран оти се затвара на една недела, а ако се покаже потреба и подолго.
*
Општинскиот кризен штаб Штип денеска почна со таргетирана дезинфекција на повеќе локации, и тоа пред сите текстилни компании, истакна градоначалникот на Штип, Благој Бочварски, кој раководи со Општинскиот кризен штаб, по денешниот состанок на Штабот.
*
Отворање на угостителските објекти, на градинките и намалување на полицискиот час, се некои од темите за кои Комисијата за заразни болести денеска би требало да разговара, по најавите дека ќе има олабавување на мерките по празниците.
Комисијата за заразни болести ги демантира информациите кои се пласирани денеска во одредени медиуми дека на утринскиот состанок е донесена одлука за целосно олабавување на мерките, заради тоа што тие не биле почитувани од граѓаните, соопшти Министерството за здравство.
*
Вкупно 289 лица за време на продолжениот празничен викенд не го почитувале полицискиот час, од нив 187 се приведени, а 355 граѓани се санкционирани за неносење лична заштита на лице.
*
Во текот на изминатото деноноќиe за време на полицискиот час, според статистичките податоци на МВР, на подрачјето на СВР Охрид, во Кичево во целост се почитувала забраната за движење.
*
Основното јавно обвинителство Прилеп денеска до прилепскиот Основен суд поднесе предлози за издавање казнени налози против три лица, а до Основниот суд Крушево поднесе предлози за издавање казнени налози против две лица поради прекршување на полицискиот час.
*
Одделението за внатрешни работи од Дебар до надлежното Основно јавно обвинителство поднесе кривична пријава против В.К.(20) од Дебар осомничен за сторено казнено дело „непостапување според здравствените прописи за време на епидемија“, информираше Стефан Димоски, портпарол на Секторот за внатрешни работи од Охрид.
*
Во Државен карантин во Хотел „Монтенегро“ кај Велес во моментот престојуваат 79 лица повратници од странство, а најголем дел од нив се млади кои работеле на крузери, сите се здравствено прегледани и се во добра состојба, информира за МИА д-р Страхил Тодоров, портпарол на ЈЗУ Здравствен дом од Велес.
*
До крајот на наеделата ќе се направи проценка, дали е потребно прогласување нова, трета вонредна состојба, рече денеска премиерот Оливер Спасовски.
ФЛЕШ ВЕСТИ:
Да не се промовираат мерки чие спроведување е во тек и со кои јавноста е веќе запознаена, како и мерки кои не се непосредно поврзани со санирање на последиците од корона кризата, укажува Државната комисија за спречување корупција (ДКСК).
*
Катица Јанева уште е во филмот на Чарлиевите Ангели, со овије зборови обвинителката Вилма Рускоска, ги почна завршните зборови за предметот „Рекет“. Според неа, Јанева со своите Чарлиеви Ангели, била подигната на пиедесталот, но таа на крај избрала да биде на страна на злото.
*
Фотографија од чантата „Луј Витон”, од предметот „Рекет”, во домот на родителите на обвинетиот Бојан Јовановски – Боки 13, денеска во Кривичниот суд Скопје, предизвика големи реакција од страна на одбраната на овој обвинет кој сметат дека јавниот обвинител, во завршни зборови пробува на мала врата да доставува доказ.
*
Над 320.000 пензионери ќе ја добијат предвреме мајската пензија. Исплатата почнува утре, 27 мај, и ќе биде етапна.
*
Малопродажните цени на нафтените деривати се зголемуваат во просек за 8,50 отсто, соопшти денеска Регулаторната комисија за енергетика (РКЕ).
СЛОБОДНА ЗОНА
„Според стравот што ВМРО-ДПМНЕ секојдневно го манифестира од можноста наскоро да се излезе на избори, не може да се заклучи ништо друго освен дека тамошните очекувања од резултатите се – изборен пораз. Да речеме дека е тоа точно и дека тој страв им е оправдан. За секое партиско раководство тоа значи соочување со персоналните политички последици по поразот, со преземањето одговорност за поразот. Би било за очекување дека, во таква ситуација, партијата би морала да се праша во што е проблемот и што треба внатре, во самата партија, да се менува?“, пишува Сашо Орданоски во Страв од летање.
„Во моментов се поставува прашањето: зошто во Македонија не се намалува бројот на заразени од Ковид-19 во обем и на начин како во другите соседни држави?
Првата причина може да се побара во мерките кои ги има преземено управувачката структура.
Во образованието има еден интересен институт, кој го негуваат дел од наставниците/професорите – вложен труд. Тоа значи дека кога даваат оцена не го вреднуваат резултатот (стекнато знаење, вештини), туку, колку ученикот/студентот се трудел, ама не постигнал никаков или, многу мал резултат“, пишува Мирјана Најчевска во Не е без причина.
„Овде ни оддалеку не се работи за тоа да се анализира само дволичноста, туку да се разбере фактот дека се работи за сосема различни, поточно, спротивставени концепти и постапки кои немаат врска една со друга. Од една страна се хуманитарните активности, а од друга – партиска пропаганда која кризата со коронавирусот ја злоупотребува за свои цели.“, пишува Џабир Дерала во Недоследност, неодговорност, незрелост… И скандали.
А. Петровска
