Вест на денот: На денешната седница Комисијата за заразни болести одлучи да и предложи на Владата враќање на полицискиот час од четврток во 21:00 часот до понеделник во 05:00 часот.
Рестрикциите ќе важат за целата територија на Скопје, со сите општини, за Тетово, за Куманово со Липково и за Штип.
За другите градови, се предлага воведување на полициски час од 16:00 до 5:00 часот следниот ден.
Предлогот треба да биде усвоен на следниот состанок на Владата.
Изјава на денот– Османи: Ќе се постават КОВИД-координатори во компаниите и во државните институции
„Денеска имавме одличен и продуктивен состанок; оформена е директна комуникација меѓу локалната самоуправа, здравствените власти, претставниците на бизнисот и претставниците на вработените. Се донесе заклучок за поставување на т.н. КОВИД координатори во компаниите, но и во државните институции, кои ќе имаат директни овластувања да го следат спроведувањето на мерките и препораките во рамките на организациите и институциите, како и да овозможат нивна полесна меѓусебна комуникација. Искрено ме радува што постои и сериозност и волја кај сите и верувам дека со спроведување на мерките и препораките набргу ќе создадат услови за безбедно одвивање на работните процеси при што економските активности и на фабриките ќе можат да продолжат“, истакна вицепремиерот Бујар Османи на денешната посета во Штип.
Вонредна состојба– Во последните 24 часа се направени 974 тестирања, а регистрирани се 101 нови случаи на КОВИД-19.
– Скопје 59
– Куманово 12
– Штип 7
– Прилеп 1
– Тетово 5
– Струга 6
– Велес 1
– Охрид 1
– Кавадарци 1
– Гостивар 3
– Кочани 3
– Пробиштип 2
На Клиниката за инфективни болести и фебрилни состојби почина 84 годишен пациент од Прилеп, хоспитализирана на 17 мај. Во ГОБ „8 септември“ починале пациент од Тетово (75) примен на 24 мај, пациент од Куманово (71) примен на 26 мај и пациент од Скопје (58) примен на 30 мај.
Денеска Институтот за јавно здравје регистрира 10 оздравени пациенти.
– Тетово 8
– Велес 2
Досега во земјата се направени вкупно 32/161 тестирања на КОВИД-19. Од вкупниот број направени тестови во изминатото деноноќие, 132 теста се во рамките на скринингот во градинки преку Центрите за јавно здравје Штип, Прилеп, Битола и Скопје. Потврдени се 2 позитивни случаи во градинки во Штип.
Вкупната бројка на КОВИДдијагностицирани во нашата земја од почетокот на епидемијата изнесува 2.492, бројката на оздравени пациенти е .1605, на починати е 145, а во моментов бројот на активни случаи во земјата изнесува 742.
*
Затворена е уште една текстилна конфекција во Штип каде дополнително е потврден позитивен тест на еден работник, објави денеска градоначалникот на Штип, Благој Бочварски по седницата на Општинскиот кризен штаб.
Со тоа, во Штип се затворени вкупно седум конфекции, а конфекцијата која сега е затворена има 250 вработени и на сите ќе им бидат земени брисеви.
*
Во текот на изминатото деноноќие на територијата на Република Северна Македонија на 392 лице им се издадени решенија за изолација, а 150 лица потпишале изјави за самоизолација.
Флеш вести
Без почитување на препораките и мерки за заштита од КОВИД-19 синоќа полициски службеници правеле забава во кратовското село Куклица.
Според информациите од Секторот за комуникација со јавност на Министерството за внатрешни работи, настанот се случил синоќа, околу 21 часот, кога бил пријавен во полиција.
„На втори јуни 2020 година, околу 21 часот било пријавено во Одделот за внатрешни работи Кратово дека полициски службеници прават забава во село Куклица, Кратовско, при што не се почитувани мерките за заштита од КОВИД-19. Веднаш се превземени мерки и известен е јавен обвинител, по чии насоки на лице место излегле полициски службеници. При увидот констатирано е дека на приватен имот во село Куклица биле затекнати осум лица, од кои седум полициски службеници, кои не биле на должност и во истиот момент биле лишени од слобода поради сомнение за сторено кривично дело по член 206 од Кривичниот законик“, информираат од МВР.
*
На неколку портали и национални телевизии се прошири лажна вест за наводна забрана за влез во Грција за жителите на неколку македонски општини како што се Тетово, Чаир, Сарај, Бутел, Арачиново, Липково, Куманово, Теарце, Студеничани и Шуто Оризари.
Лажната вест се повикува на соопштение на грчкото МНР, чијшто принтскрин масовно се споделува и на социјалните мрежи. Лажното соопштение е напишано на грчки јазик и писмо освен имињата на македонските општини кои се напишани на латиница.
На официјалната страна на грчкото МНР вакво соопштение воопшто и не постои. Во единственото официјално соопштение кое се однесува на отворањето на границите со соседните земји стои дека копнените гранични премини меѓу Грција и соседните Албанија, Северна Македонија и Бугарија ќе бидат отворени на 15 јуни. Посетителите ќе бидат подложени на тестирања при пристигнувањето.
*
Управата за јавни приходи, најостро ги демантира невистините и обвинувањата дека наводно 200 лица од УЈП биле во самоизолација поради контакт со директорката, Сања Лукаревска.
Во интерес на јавноста, УЈП информира дека поради протоколите, во домашна изолација е дел од раководството на Управата за јавни приходи и бројката не надминува 40.
*
Независниот академски синдикат (НАкС), кој реагира на постапката за избор на ректор на Скопскиот универзитет почната од актуелниот ректор Никола Јанкулковски, денеска до Владата достави барање за автентично толкување на Уредбата за примена на законот за високото образование за време на вонредна состојба. Барањето на НАкС содржи седум прашања со кои Синдикатот бара Владата да даде одговори за да го разјасни член 5 од Уредбата кој го уредува прашањето за избори на органи и тела на јавните високообразовните установи и за продолжување на мандатите во време на вонредна состојба.
Слободна зона
„Во време на кризи, јавноста сака смирување – не лажење! – со точни информации и анализи за состојбите, со објаснување на постапките и мерките што се преземаат на начин што ќе ѝ овозможи на таа јавност логично и одговорно однесување, без страв и паника. Паниката, впрочем, никогаш не е добар сојузник во политиката, а ширењето страв е очајничка стратегија“, пишува денеска Сашо Орданоски во денешната колумна „Нормални против ненормални? “
