Продолжува објавувањето видео снимки поврзани со случајот „Рекет“
Италијанскиот весник „Ла Верита“, на својот портал и на Фејсбук страница, утрово објави втор аудио материјал каде се слуша и гласот на Специјалната јавна обвинителка, Катица Јанева.
Во недостиг од посериозни докази и изјави од релевантни личности и институции, јавноста се скандализира со овие и ваквите „докази“ во оваа афера.
Во последниот разговор од аудио снимката се слуша женски глас кој вели дека да не се секира Камчев, дека сè ќе биде ок. Весникот тврди дека тоа е гласот на Катица Јанева.
Јанева: Ги повикувам истражните органи што е можно побргу да ја завршат истрагата, да ги приберат сите докази и да ги завршат сите форензички вештачења поврзани со случајот „Рекет“, за целосно расчистување на овој случај и обелување на моето име.
Специјалната јавна обвинителка како реакција на објавените снимки од италјанскиот весник „Ла Верита“ и реакциите што произлегоа во јавноста, денеска се јави со соопштение до јавноста.
„Ја слушнав снимката, објавена на порталите поврзана со случувањата за случајот „Рекет“. Фрапирана сум како моите постапки како Специјален јавен обвинител се донесуваат во каква била корелација со случајот „Рекет“. Како Специјален јавен обвинител моја обврска е да контактирам со сите осомничени како и со други лица во врска со кривичните постапки кои се водат во ова Јавно обвинителство и од сите нив да се обидам да извлечам што поголем број на инфорамции како би ја подобрила позицијата во контекст на осомничените за секоја истрага/предмет поединечно“, се вели во соопштението.
Стефанова: Јанева ни наложи да ги затвориме предметите „Империја“ и „Поштенска банка“ и осомничените да не одат во затвор
Обвинителката од СЈО, Лиле Стефанова денес се обрати со соопштение по спомнувањето на нејзиното име во снимките на „Ла Верита“.
„Како предметен обвинител за предметот „Империја“, кој засега е во центарот на вниманието и околу кој кружат голем број на шпекулации, сметам дека неопходно е во јавноста да изнесам одредени информации, токму во насока на спречување на таквите шпекулации“.
„ Одлуката да биде дадена согласност за издавање на времена патна исправа на осомничениот Јордан Камчев, Катица Јанева ја донела во време кога јас користев годишен одмор и за истата не ме извести. За оваа одлука дознав од обвинителката Елизабета Јосифоска, кај која било донесено на потпис писмено изготвеното мислење“, се вели во соопштението на Стефанова.
Флеш вести
Заев: Позитивни трендови во размената со Грција по потпишувањето на Договорот
„Како резултат на потпишувањето на Договорот со Грција, трговската размена во 2018 година се зголеми за 15,8 отсто, а извозот порасна за 5,8 отсто. Во периодот јануари-мај 2019 меѓусебната трговска размена продолжи со позитивен тренд од 4,7 отсто, напиша премиерот Зоран Заев на својот Фејсбук профил.
Јовески: И Јанева и Стефанова ќе бидат сослушани
Според Јавниот обвинител Љубомир Јовески, сите инволвирани лица во конкретниот случај „Рекет”, ќе бидат сослушани и испитани во истражната постапка.
ВО ФОКУСОТ НА ЦИВИЛ МЕДИА
ЦИВИЛ Медиа како отворена платформа за сите што сакаат да ја изразат својата слободна мисла, неделава доби и нов колумнист, екс Министерот за здравство и градоначалникот на Општина Гостивар, Арбен Таравари, кој во својата колумна „Експертска влада – од Хобити и Хулигани до Вулкани“ се осврнува на (не) способните владеачи и политичари, а во колумната „ Шахот и политиката“ дава свој поглед на компромисите како алатка што ги следи владите, како во светот, така и кај нас.
Како редовен коментатор на ЦИВИЛ Медиа, и оваа недела имавте можност да прочитате поенти од господинот Џевдет Хајредини, во кои посочува за ветингот, охридскиот договор, партиските војници, правната држава.
Џабир Дерала во своите Рафали посочува за важноста на поединецот во борбата против пропагандата и хибридната војна, како супер добредојдена единица во алгоритамот на моќта, како и дека пасивноста и заблудите се додаваат на победничкото конто на уништувачите на демократијата.
Д. Тахири
