ВЕСТ НА ДЕНОТ: Одобрен обвинителниот акт за настаните во Собранието од 27 април
Советот за оцена на обвинителниот акт при Основниот кривичен суд Скопје донесе решение со кое обвинителниот акт КО бр 21/19 поврзан со настаните од 27 април 2017 година во Собранието на РМ, се одобрува во целост.
„Заради интерес на медиумите, ја информираме јавноста дека Советот за оценка на обвинителен акт надлежен да постапува по обвинителниот акт КО бр 21/19 поврзан со настаните од 27 април 2017 година во Собранието на РМ, по одржана јавна седница како и ценење на фактите и доказите во истиот, донесе решение со кое обвинителниот акт се одобрува во целост“, информираат од Основниот кривичен суд Скопје.
Обвинението се однесува за организирање на настаните во Собранието на 27 април 2017 година, а осомничени се поранешни министри Миле Јанакиески и Спиро Ристовски, поранешниот претседател на Собранието, Трајко Велјановски и екс-директорот на УБК, Владимир Атанасовски.
Спасовски-Тимоние: Државата се движи во вистинската насока, државните интереси мора за сите да се во прв план
Претседателот на Владата, Оливер Спасовски, денеска имаше средба со францускиот амбасадор во земјава, Кристијан Тимоние, на која е констатирано дека Република Северна Македонија постигна многу на домашен и на меѓународен план и оти се движи во вистинската насока во однос на интеграциите. На средбата, како соопшти владиниот Сектор за односи со јавноста, била изразена надеж дека преодната Влада ќе се фокусира на обезбедување фер и демократски избори, како и очекување дека ќе продолжат реформските процеси со активно темпо и придонес на позитивен развој на процесите.
„Ќе продолжиме со политиките на дијалог што придонесуваат кон добра клима во државата. Општите и државните интереси мора да бидат во прв план кај сите политички субјекти. 2020 година е значајна година за граѓаните на нашата држава, поради остварувањето на полноправното членство во НАТО, но подеднакво важни за нас се и европските интеграции“, порача премиерот Спасовски.
Дисциплински органи на Адвокатската комора ќе утврдат дали адвокатот Страшевски сторил повреда
Адвокатската комора на Република Северна Македонија по прибирањето на сите материјали во врска со преписките меѓу Основниот кривичен суд Скопје и адвокатот Јовица Страшевски ќе ги предаде на дисциплински органи на Комората, кои се надлежни за утврдување на евентуална повреда сторена од адвокатот.
Од Адвокатската комора на РСМ наведуваат дека по прибирање на сите докази, заради утврдување на фактичката состојба, истото ќе ги проследи до дисциплинските органи на Комората кои се надлежни за утврдување на евентуална повреда сторена од адвокат.
ФЛЕШ ВЕСТИ
Претседателот на СДСМ, Зоран Заев, и генералниот секретар на партијата, Љупчо Николовски, денеска се сретнаа со амбасадорот на Народна Република Кина во Република Северна Македонија, Н.Е. Џанг Ѕоу
До крајот на месецов се очекува да биде објавен тендерот за првите 20 километри локални патишта со проектот за подобрување на локалната патна мрежа за кој неодамна беше обезбеден кредит од 70 милиони евра од Светска банка, соопшти министерот за транспорт и врски Горан Сугарески.
Македонскиот пасош на 47 место на листата „Хенли Паспорт Индекс“ на „најмоќни патни исправи“ во светот, според кој со македонски пасош може слободно без виза да се патува во 123 земји ширум светот
Претседателот Стево Пендаровски денеска го прими претседавачот на воениот комитет на НАТО, воздухопловниот маршал Стјуарт Пич, кој престојува во официјална посета на Република Северна Македонија
Собраниската Комисија за здравство денеска ја одржа 33. седница на чиј дневен ред беше Предлог-закон за контрола на опојни дрои и психотропни супстанции во прво читање
Град Скопје ја потпиша Париската декларација за ставање крај на епидемијата на ХИВ
ЦИВИЛНИ АКТИВНОСТИ
Перспективи 2020 – Герасимовски: Подготовките за пописот во 2019 година не се остварија
„Препораките и сугестиите за 2020 година се да бидеме успешни, бидејќи нашите интенции се многу познати во однос на креирањето на нашите политики кон институциите на системот, надвор кон НАТО и ЕУ, кои ги бараат сите овие обврски брзо реализирани и исполнување на условите, комуникација со граѓаните и едно општество за сите“, изјави Донко Герасимовски во разговор со ЦИВИЛ Медиа.
Семинар на ЦИВИЛ за транспарентни и одгворни политички процеси во Гостивар
ЦИВИЛ влегува во новата 2020 година со вообичаеното, интензивно темпо на активности. На самиот почеток на годината, меѓу многубројните активности, се издвојуваат секогаш интересните семинари посветени на транспарентните и одговорни политички процеси, а со кои се поттикнуваат активизмот, граѓанското учество и граѓанското новинарство.
Апликација за учество на регионален семинар „Граѓански објектив“ во Гостивар
Првиот семинар од 2020 година ќе се одржи на 25 јануари во Гостивар, а право на учество ќе имаат граѓанките и граѓаните од Полошкиот плански регион.
Биљана Јордановска
во соработка со Дехран Муратов, Ангела Петровска и Петар Клинчарски
