пишува: ЏАБИР ДЕРАЛА
Неодамна, решив да ги запишувам, на едно место, прашањата што ми ги поставуваат насекаде низ Северна Македонија. Денеска сакам да ги споделам со вас. Дел од овие прашања се поставени токму така, како што се пренесени овде, а дел се десетици прашања споени во едно. Прашањата ми ги поставија сосема различни луѓе, од различни места, од различни заедници, со најразлични професии и ниво на образование. Не се познаваат меѓусебно. Некои работат и во институциите на локално или државно ниво. Нема мои зборови во овие прашања, иако некои се како ехо на мои претходни “рафали”. Дел од изразите, сепак, морав да ги испуштам, бидејќи содржат погрдни зборови, особено на сметка на опозицијата. Повелете, ова се ваши прашања:
Зошто воопшто премиерот би се занимавал со оној (…) Мицкоски? Зошто мора да го поканува на преговарачка маса, кога знаеме дека е пион на кукавичкиот бегалец од правдата (се мисли на Груевски)? Зошто мора Мицкоски да се чека за СЈО и за ОЈО? Зошто Заев не го растури ДПМНЕ или барем да го смени Мицкоски?
Зошто премиерот со насмевка се сретна со рускиот амбасадор, а потоа отвори и објект на руска компанија што го поддржува Путин?
Зошто премиерот не им отиде на оние дивоградителите во Охрид и не ги поапси сите, сосе Рамиз Мерко?
Не може ли да се поапсат сите пратеници што се огрешиле од законот и да се заврши работата? Зошто се води дијалог со криминална банда за тоа како треба да изгледа македонското судство? Толку ли е тешко да се пикнат во затвор сите директори, министри, судии, заменици… сите познати и помалку познати експоненти на злото во политиката, бизнисот, криминалот, академијата и медиумите?
Не може ли да се спроведе правдата, решително, со тупаница, за еден ден?
Зошто премиерот преговара со криминалци, наместо да му издаде строга команда на системот да се пресмета со престапниците? Па судиите што не ја спроведуваат правдата, исто така, да завршат во Шутка?
Знае ли премиерот дека мандатот го доби за да спроведе правда, а не за пазарење со оние што ја уништија правдата? Зошто премиерот не им даде одврзани раце на тие што имаат докази, да ги уапсат Али Ахмети, Муса Џафери, Сашо Мијалков и сите останати покрупни и поситни риби, во и вон неговата партија, за сите за кои постојат сознанија дека краделе и ја злоупотребиле својата моќ, познанства, а сега триумфално парадираат низ јавноста?
Зошто Мицкоски не е под истрага за хидроцентралите?
Зошто Заев не ги пушти сите бомби?
Зошто медиумските слуги на Грујо не се под истрага за сите криминали, од финансиските до оние против правата, слободите и достоинството на луѓето? Зошто нивните газди и слугите што работат за нив господарат во македонскиот медиумски простор и понатаму?
Зошто премиерот дозволува да си играат со него како со играчка? Зошто Заев дозволи вемеровците, после падот, да зајакнат и да ги разбијат придобивките од отпорот „ко беба звечку“?
Зошто премиерот се согласи да преговара со Груевски во Пржино, летото, 2015 година?
Зошто Заев и неговиот тим му дозволуваат на Груевски да ја влече јавноста за нос и го оставаат да се брани со аргументите што, всушност, говорат против него (криењето на бруталното убиство на Мартин Нешковски, на пример)?
Зошто Заев своевремено не ги остави граѓан(к)ите сами да му пресудат на режимот, па што биде, нека биде?
Зошто премиерот го легитимира злосторничкото здружение со лидерски средби? Зошто не го тресне од земја секој што се обидува да згази на придобивките од граѓанскиот отпор што започна уште во 2011 година ( Стоп за полициската бруталност)?
Зошто премиерот им простува на тие што ѝ забиваат “долги ножеви” во грбот на Северна Македонија? Знае ли дека неговото простување треба да го претставува простувањето и на сите што настрадаа од режимот? Знае ли премиерот Заев дека, ако тој прости како христијанин и индивидуа, не мора да значи дека направил добро дело за демократијата и владеењето на правото?
Зошто премиерот, кого го запознавме како антинационалист, говори за обединување и иднина, дозволува националистите и меѓу Македонците и меѓу Албанците да ја влечат земјата наназад, кон мрачното минато? Па и пари и други придобивки им дава?
Зошто Заев дозволува да се шетаат на слобода функционери, судии, обвинители и слични ѕверки за кои има докази дека се виновни за сите крвави настани во земјава?
Зошто мора да ги моли сите да сработат нешто, наместо да ги отпушти и казни?
Ќе нѐ биде ли?
Сигурен сум дека има добри и помалку добри одговори на сите прашања. Јас престанав да се обидувам да ги одговорам. И онака не се однесуваат на мене, си велам понекогаш, иако знам дека тоа е, до некаде, погрешен став.
Но, на голем број од овие и вакви прашања не можам да одговарам најмногу затоа што тие веќе го содржат ПОГРЕШНИОТ ОДГОВОР во себе. И говорат за склоност на луѓето да размислуваат еднострано. Уште повеќе, ја открива нивната склоност кон авторитарност. Очекуваат за сѐ да биде повикан премиерот на одговорност, без оглед на ограничувањата и поделбите на моќта, ингеренциите и одговорноста – една личност, еден владетел… Меѓу другото, дел од овие прашања се сведоштво за отсуство на волја да се прифати сопствената одговорност, заедничка и индивидуална, граѓанска и гласачка. Многу од тие прашања се упатени на погрешна адреса. Да признаам, и јас (си) поставувам вакви и слични прашања, особено во настап на лутина и разочарување. Но, потоа, во потрагата по одговорите, сфаќам дека тие се потешки отколку што сум очекувал, без оглед на тоа колку јас самиот сакам да го прифатам тоа или не.
Да не речете дека денеска сум нешто особено фин, еве, ќе се изразам така како што чувствувам: Голем дел од овие прашања мора да ги одговори џганот со седиште во грдата палата (дивоградба). А на тоа можеме да ги натераме ние, секој од нас. А потоа да му ги поставиме вистинските, сѐ потешки, прашања и на тој од кого се бараат сите одговори, па и оние погрешните.
Последното прашање за тоа „дали ќе нѐ биде“ ми го постави еден граѓанин на Велес, во петокот. „Зависи од нас самите“ – му одговорив. Не беше задоволен од одговорот. Не бев ни јас.
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон. Врз основа на договор за соработка, оваа содржина е достапна за Плусинфо и Слободен печат без ограничувања.