Вицепремиерот задолжен европски прашања Бујар Османи, изјави дека кадровските промени кои се очекуваат на денешната посебна владина седница се потребни за да се смени фокусот на дејствување на Владата и затоа се потребни промените во администрацијата.
„Има договор помеѓу коалициските партнери четиригодишниот мандат на оваа Влада да се дели на два дела. Во првиот дел да се затвораат политичките прашања и да се постигнат стратешки цели на државата во однос на НАТО и ЕУ и мислиме дека до крајот на годината ќе биде и НАТО и почеток на преговори со ЕУ. Остатокот од мандатот се разбира фокусот целосно ќе се префрли од политика во политики. А тоа значи политики за поголем животен стандард за подобра животна средина за повеќе работни места за повисоки плати итн.“, рече Османи.
Тој истакна дека е исполнет предусловот со затворањето на политичките теми.
„Затоа коалициските партнери одлучија секој во својот двор во својата партија да направи одредени реструктуирања, односно обнова на кадровските потенцијали што ги имаат партиите во раководењето на институциите. Очекуваме секоја партија да предложи до Владата одредени промени вклучувајќи ја тука и ДУИ, дел ќе бидат преместени од една институција во друга, зборам за нашите претставници, дел ќе бидат сменети со нови имиња“, рече Османи.
Вицепремиерот информира дека денеска ќе има само одлуки за разрешувања додека на наредни седници на Влада и да се назначуваат нови кадри. Според него, кадрите на ДУИ кои ќе бидат заменети ќе бидат помалку од 10.
Премиерот Зоран Заев, денеска на прес конференција ги соопшти имињата на носителите на функции кои се опфатени со „метлата“ најавена уште пред изборите.
Реконструкцијата овојпат опфати 50 директори, членови на управни и надзорни одбори.
Меѓу нив се директорите на МЕПСО и ЕЛЕМ, Сашо Василевски и Драган Миновски, директорот на Државниот архив, Кирил Петров, директорот на Агенцијата за лекови Ќахил Ибраими, директорката на Драмски театар, Викторија Рангелова, Вулнет Адеми директор на Агенција за странски инвестиции, директорот на Македонија пат, Гајур Кадриу, директорот на Здравствен дом Скопје, Злате Мемедовиќ.
Како што рече Заев, неговите предлози ќе бидат ставени на владината седница која ќе се одржи денеска. Заев им се заблагодари на сите разрешени функционери и додаде дека на некои од овие лица ќе им биде понуден нов ангажман, доколку се заинтересирани.
Премиерот најави дека од денеска ќе почне именувањето на новите.
М. И.
