Италијанскиот портал „Ла Верита“ објави видео снимка од двајца обвинети за „Рекет“
Објавена е прва видео и аудио снимка каде двајца обвинети од скандалот “Рекет” се гледаат како ги земаат парите од осомничениот во случајот „Империја“, Јордан Камчев, и излегуваат од неговиот дом. На снимката објавена од италијанската “Ла Верита” се гледа како Бојан Јовановски и Зоран Милески Кичеец излегуваат со торба полна со пари од куќата на бизнисменот Камчев.
На крајот е објавен и еден аудио разговор во кој Јовановски се слуша како му ветува на Камчев дека “во понеделник, или најдоцна во вторник ќе биде ослободен”.
Јовески: Снимката не е излезена од Обвинителството
Видео снимката што денеска ја објави италијанскиот весник „Ла Верита“ во врска со предметот „Рекет“ не е излезена од Обвинителството, тврди државниот јавен обвинител Љубомир Јовески.
– Снимката објавена во италијанскиот весник не е од извор од Обвинителство, изјави Јовески.
Од Основното јавно обвинителство за организиран криминал и корупција кое го води предметот„Рекет“, не прецизираат дали снимката им е позната и дали ја имаат како доказен материјал.
Деполитизација на Бирото за јавна безбедност во интерес на граѓаните
Деполитизација, целосно исклучување на можноста за политичко влијание, континуирани реформи во насока на целосна професионалност, владеење на правото и етичко однесување се насоките во кои треба да се движи работата во Бирото за јавна безбедност (БЈБ), за да ја оствари основната функција – заштита на животот, личната сигурност и имотот на граѓаните, заштита на слободите и правата на човекот и граѓанинот, спречување на вршење кривични дела, прекршоци, одржување на јавниот ред и мир, контрола и движење на престој на странци, гранични проверки и надзор.
Флеш вести
Проблемот со паркингот на Клинички ќе се решава со монтажни гаражи преку јавно-приватно партнерство.
Воведена е делумна забрана за движење во шума со оглед на зголемената опасност од појава на пожари на отворен простор заради високите температури што се најавуваат во летниот период.
Забраната почнува да важи од денеска, од 6:00 до 20:00 часот и ќе трае се до нејзиното отповикување. Забраната важи во шумите со кои стопанисува ЈП „Национални шуми“.
Советот на Општина Охрид денеска на седница ја усвои предлог-одлуката за мораториум на градење и донесување урбанистички планови, како и легализација на објекти до донесување на Планот за управување со светскиот природно и културно наследство на Охридскиот регион, или најдоцна до 1 февруари идната година.
ЦИВИЛ активности
ЦИВИЛ – Центар за слобода организира семинар на 14 и 15 август, во хотел „Романтик“,на Велешко Езеро, на темите„Институциите, медиумите и граѓанскиот сектор заедно во борба против корупцијата“ и „Транспарентност и одговорност во политичките процеси“. Билјана Ивановска, ДКСК, Бранимир Јовановиќ, Институт за општествени и хуманистички науки, до скоро, советник на екс-министерот за финансии, Тевдовски, Аце Коцевски, Градоначалник на Велес и Џабир Дерала, Претседател на ЦИВИЛ, се дел од агендата на претстојниот семинар на ЦИВИЛ. Организацијата нуди ексклузивна можност за ограничен број посетители да присуствуваат на презентации и излагања на извонредно жешки теми, на семинарот „Транспарентност и одговорност во политичките процеси“.
Д. Тахири
