пишува: ЏАБИР ДЕРАЛА
Други соодветни наслови: Борбата за вистината тргнува од Волино… Или: Сите сме Волино… Или: Волино во нашите срца… Сонцето од Кутлеш се брани од Волино… Пијана работа… Трета лига…
Бев на аеродромот во Виена и, како и другите, лежев (буквално) на кожните гарнитури кај гејтот 36, чекајќи го летот за Скопје, кога на дланки ми слета сензационалната вест за фудбалскиот натпревар од третата македонска фудбалска лига што се одиграл меѓу Волино и Црнобуки. Судијата не досудил како што треба (досудил офсајд за гостинскиот тим), по што избила општа мешаница. Паднале тупаници, пцости, дошла полиција. Напаѓачот на судијата го носеле кон полициското комбе, кога неколку мештани го блокирале излезот од селото. Се гледа и на видеото објавено на социјалните мрежи.
Приказната до сега е само комична селска приказна за третолигашка, меѓуселска тепачка, со мирис на ракија и пиво од „пред кооперација“. Но, тоа е точката од каде што продолжува „светата“ битка на „куририте“.
Тепачот на судијата и неговите другарчиња одеднаш стануваат „борци за слобода“ кои се „жртви“ на предавничката власт. Со магична трансформација, ја откриваме курирската „вистина“ дека тоа не се селски насилници, туку знаменосци на „сонцето од Кутлеш“, та затоа биле „сардисани од заптиите на предавничката власт“. Уште една епопеја за „храбрите борци на македонскиот непокор“ чиј епицентар е, ни помалку, ни повеќе, туку селото Волино.
„Востанието“ на македонските „патриоти“ е, всушност, „задушено“ со гестот на градоначалникот. Кутрите, им било страв да се качат во „марица“, но затоа, тука бил градоначалникот кој доброволно се пријавил да се труцка заедно со „патриотите“ до полициската станица во Охрид. Главната „заслуга“, сепак, ќе ја соберат тепачите, кои се прикажани како „патриоти“ и „маченици“ за „светата кауза“ според „куририте“ (заеднички назив за самонаречени медиуми за кои нема да трошам зборови).
И тука некаде би требало да заврши целата приказна, смешна, гротескна, не многу значајна. Но, благодарение на „куририте“, Волино стана Македонија. Сите станавме Волино. А на тоа му одговори МВР со одлучна мерка… Се разбира, ова е иронија.
По објавувањето на владината стратегија за „одлучна борба против дезинформациите, лажните вести и хибридните удари врз демократијата“ видовме само одлучна борба против стратегијата. Овој став ќе го повторам и во првата наредна прилика, бидејќи денеска сакам да се задржам само на срцето на македонскиот отпор – Волино, селото во малата, живописна општина Дебарца.
На селската тепачка што беше прикажана како мало „востание“, благодарение на „куририте“, МВР одговори, ни помалку, ни повеќе, со претставката до ЗНМ, СЕММ и АВМУ „поради очигледното свесно дезинформирање од одредени медиуми во врска со инцидентот и очекуваат новинарските организации да реагираат на ваквото непрофесионално постапување“. Ова е веројатно „најодлучниот“ удар против дезинформациите што можеа да го смислат институциите против дезинформациите. Притоа, МВР изрази надеж дека „овие организации соодветно ќе реагираат на непрофесионалното, неетичко и очигледно свесно дезинформирачко постапување со цел поттикнување на омраза, насилство и нетрпеливост на неколку медиуми“. Што е тоа „соодветно“ што можат да го сторат ЗНМ, СЕММ и АВМУ, а што не може државата, останува тајна.
До големата разрешница поврзана со „патриотското востание“, останува сите тивко, во себе, да повторуваат „Сите сме Волино!“ и однапред да се радуваат на „соодветните“ реакции…
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон. Врз основа на договор за соработка, оваа содржина е достапна за Плусинфо и Слободен печат без ограничувања.
