пишува: ПЕТРИТ САРАЧИНИ
Денес, драги мои, нашиот Кодекс на новинари полни 18 години. Точно толку поминаа од 14 ноември 2001 година кога, во мошне турбулентен и значаен период за нашата земја, новинарите направија исчекор во вистинска насока, и го донесоа документот кој не е само основа за воспоставување стандарди во професијата, туку и патоказ за јавноста и граѓаните, за тоа кој е всушност новинар и што е новинарство, а што не е.
Како што забележавте, овој ден нашата медиумска заедница го заборави и одмолчи. Со оглед каква е состојбата со почитувањето на стандардите кај нашите медиуми, не е ни чудно.
Но, како еден од 40тината потписници на усвојувањето и обзнанувањето на кодексот тој 14 ноември 2001-ва, јас лично, таа обврска преземена пред 18 години и ден – денес ја чувствувам како голема чест и одговорност. И, затоа, чувствувам за потреба да потсетам на овој датум, на Кодексот на новинарите кој треба да биде свето писмо на секој вистински новинар, да потсетам на на секојдневното газење на стандардите и етиката на професијата, како и на борбата што ни претстои за вистината да допре до граѓаните.
И решенијата за нашата подобра иднина лежат токму во овој документ. Таа е приказната, се менуваат технологиите, платформите, но суштината на новинарството останува иста, запишана во тој кодекс.
Неговото почитување, солидарноста во професијата која се базира на неговите вредности, може да придонесе многу за подобрување на состојбите и правење разлика меѓу вистинските новинари и оние што само така се претставуваат. А познавањето и прифаќањето на тие вредности од целата јавност, уште повеќе ќе придонесе за таа да стане поартикулирана и поуспешно да ги брани своите интереси наспроти центрите на моќ кои токму преку корумпирање на овие вредности сакаат да го јавнат новинарството, а со тоа и јавноста.
На сите вистински новинари и на целата јавност и го честитам роденденот и полнолетството на Кодексот, со желба за поуспешна заедничка борба во остварување на неговите вредности и идеалите на професијата која е чувар на јавниот интерес!
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон.
Со преземање на било која содржина објавена на ЦИВИЛ Медиа, спротивно на Условите, се согласувате на ЦИВИЛ да му исплатите надоместок од 60.000 денари во рок од осум дена по преземањето на содржината. Оваа обврска не застарува, а за секое доцнење на исплатата ќе биде пресметана соодветна законска камата.
Доколку некоја содржина е потпишана со ЦИВИЛ Тим за комуникации, тогаш преземањето е дозволено во целост.
