од корнер: ЗОРАН ИВАНОВ
И овој новиот грчки премиер, од познатото политичко антимакедонско семејство, се пали на реклами. Како прле пред магаре, се истрча со промовирање бренд за грчките производи што се именувани како Македонија и македонски.
На собирот во Солун, организиран за бизнисмените на двете земји за промоција на нивните можности, на можностите на грчкото и на македонското стопанство за интензивирање на бизнис соработката меѓу двете соседни држави, надвор од секоја елементарна дипломатска етика, грчкиот премиер маркетиншки се изнапрчи дека Македонија била Грчка. И дека, во стилот на оној наш доскорешен македонски античар со „Ти си Македонија“, се истопори со неговото „Ние сме Александар Велики“.
Македонија била голема и негов бил Александар Велики. Милениумски поглед наназад на форум посветен на иднината. Наместо со стопанска тема, со својот политичко историски вокабулар, Киријакос Мицотакис пред бизнисмените во Солун се престави на начин како да му забрмчеле истите оние антички бубачки кои до неодамна бучно брмчеа и овде. Наместо мерки и премиерски пораки за поттик на економските соработки, на бизнисмените таму, ненајавено, им го довлечка милениумското минато.
Наместо во овој дваесет и први век да се прикаже како модерен европски политичар, како некој последен балкански романтичар запна на милениумското минато. Исто како и во неговото предизборие и сега се возбудува на Александар, на антиката, на Македонија, на потеклото на видовите. Како тргнал со форсирањето на Македонија, ќе ѝ го заборави името на државата чиј премиер е.
На Балканот има многу историја и многу политика. Овде минатото во континуитет ја вјаснува иднината. Дури и во ова глобално дигитално време, на овие полуостровски простори на генерации и генерации деца, наместо автентична и фактографска, уште им се подметнува фингирана политичка историја. Таквото извртено минато на Балканов создаде политичари кои и денес идоли гледаат во минатото. Како во себе да ги имаат цар Борис или крал Александар или силниот Скендербег или монарх Никола и така со ред.
Исто и примерот од текстов кого го чекаме овде да му му се поклони на воинот на коњ и да му ги цуне копитата на Букефал. И тој се пали на тоа што Александар бил Велик. И брендовски надвикува дека Македонија е голема.
Актуелниот грчи премиер Мицотакис и пред настапот на економскиот форум требаше да знае дека сите знаеме дека Александар бил и Македонски и дека бил Велик. И дека и Македонија е голема.
Но младиот Киријакос не разбра дека сите разбраа дека на бизнис форумот во Солун тој беше мал. Многу мал.