ВЕСТ НА ДЕНОТ: Франција го ратификуваше Протоколот за НАТО, остана уште Шпанија
„Националното собрание на Франција го ратификуваше протоколот за пристапување на Северна Македонија во НАТО. Уште само еден чекор до целта што ја зацртавме во 1993 година – полноправно членство во Алијансата!“, објави министерот за надворешни работи, Никола Димитров на Твитер.
Министерката за одбрана, Радмила Шекеринска, на Твитер објави: Франција ратификуваше! Ни остана уште Шпанија! Стануваме полноправна членка на НАТО!“.
Пораката на Рускоска ги налути судиите
СМС-пораката на шефицата на Обвинителството за организиран криминал, Вилма Рускоска, дека ќе поведе финансиска истрага против судиите од Апелацискиот суд, кои донесоа одлука поранешната специјална обвинителка Катица Јанева, обвинета во случајот „Рекет“, да излезе од притворот во Шутка и да издржува куќен притвор, ги налути апелациските судии.
За судиите ваквото однесување на Рускоска е преседан во правосудниот систем, а за Судскиот совет е во спротивност на Етичкиот кодекс на јавните обвинители.
– Ако ти, со советот сте ја пуштиле Катица, да знаеш дека од гаќи ќе ве истресам цел совет со финансиска истрага. Заради судии како Вас, никогаш нема во ЕУ да влеземе. Ако не е твојот совет, се извинувам. Ама ако сте вие, ќе видите“, е содржина на СМС-порака, како што соопшти Апелацискиот суд, која обвинителката Рускоска ја испратила до еден од членовите на Кривичниот совет на Апелација.
Велковски: Мене не ми смета мојата пречка, туку ми сметаат пречките од околината
Мене не ми смета мојата пречка, туку ми сметаат пречките од околината. Ме нервира кога сум спречен да одам некаде ако нема рампа или ако нема превоз за мене, и родителите мораат да ме носат. До сега бев мал, па родителите ми помагаа и ги отстрануваа пречките за мене. Но, сакам да пораснам во човек кој ќе биде независен, порача 11-годишниот Јане Велковски, застапник за правата на децата со попреченост на панел дискусијата – „Да не изоставиме ниедно дете: за секое дете, сите права“ на собирот на високо ниво во Генералното собрание на Обединетите нации.
Како што информира денеска Канцеларијата на УНИЦЕФ во Скопје, тој на собирот што се одржа во рамки на “Триесет години од усвојувањето на Конвенцијата за правата на детето и одбележување на Светскиот ден на детето“ што се одржа на 20 ноември 2019 во седиштето на Обединетите нации рече дека децата како него сигурно исто се чувствуваат, порачувајќи им да бидат упорни и никогаш да не се откажуваат од својот сон.
ФЛЕШ ВЕСТИ
– Државниот санитарен и здравствен инспекторат (ДСЗИ) соопшти дека вчера извршил вонреден инспекциски надзор во ординацијата која се наоѓа во рамки на КПУ Затвор Скопје, а е дел од ЈЗУ Здравствен дом Скопје. Надзорот, како што посочуваат од ДСЗИ следел по објавените информации во електронските медиуми од страна на адвокатите на Бојан Јовановски, кои обвинуваат за лекарска негрижа, во однос на неговата здравствена состојба.
– Имаме стабилни односи со ДУИ, но до изборите е важно да се фокусираме на тоа што ќе понудиме на граѓаните, а тие на изборите со тоа како ќе се определат со гласовите така ќе не насочат во делот на идните соработки.
Ова го истакна премиерот Зоран Заев одговорајќи на новинарско прашање во врска со изјава на потпретседалот на партијата Мухамед Зеќири дека не сака да коалицира со ДУИ, посочувајќи на демократијата во СДСМ и постоењето на правото на дискусија, слобода и различно мислење внатре.
– Ако пред две години имавме само една жена полковничка, денеска имаме три. Ако порано на повисоките позиции немало ниту една жена, сега првпат во историјата на нашата држава имаме жена која што е аѓутант на врховниот командант. Нашата политика е буквално секоја кандидатка за војник, која ги исполнува условите – физички, здравствени и образовни, да добие шанса да биде примена, и до денеска ниту еден конкурс не се заврши без да бидат примени сите кандидатки коишто ги исполниле условите.
Ова го истакна министерката за одбрана, Радмила Шекеринска, на Регионалната конференција „Улога на жената во сочувувањето на мирот и безбедноста-Резолуција 1325-Основа за акција“ што се одржа денеска во Скопје.
– Министерката за правда Рената Дескоска денеска изјави дека се залагаат за ветинг и оти чесните судии и обвинители не треба да се плашат од злоупотреби при спроведување на тој процес.
– Управата за јавни приходи денеска ги повика граѓаните кои ја користат апликацијата „МојДДВ“ да извршат проверка на податоците од трансакциската сметка заради враќање на дел од данокот на додадена вредност.
– Шефот на државата Стево Пендаровски денеска вети дека ќе преземе сè што е во негова надлежност со цел да се ублажат негативните ефекти од климатските промени и упати јавен апел до сите надлежни во земјава да го зголемат својот ангажман.
МИСЛА
Внимание: Срча до колена, дебатираа Шилегов и Трајановски!
„Зошто мора СЕКОЈА политичка дебата во Македонија, па и оваа за градот, да биде претворена во улична расправија со засукани ракави? Наместо судир на урбани концепти, ни се сервира судир на сметководствени биланси, со многу алузии за криминали и злоупотреби. Од бивши и сегашни градоначалници на главниот град се очекува и одредено ниво на апстракција на проблемите, расправа за филозофијата на современото живеење, а не само викачки, саморекламерски натпревар за асфалтирани квадрати и насадени тревници. Градоначалникот е како диригент на голем симфониски оркестар кој не е таму само за точно да ги прочита нотите и ритамот во партитурата, туку да го пренесе и своето разбирање на духот на делото“, пишува Сашо Орданоски.
Ангела Петровска во соработка со: Дехран Муратов, Биљана Јордановска и Сашо Орданоски
