„Извештајот на индексот на перцепција на корупцијата за 2019 година од Транспаренси интернешнл е пресметан врз база на 7 извори на податоци од 7 независни инстицуии специјализирани во областа на управувањето како и анализа на бизнис климата и дека резултатот се формира врз основа на показатели од последните две години, односно врз основа на проценета корупција во јавниот сектор“, изјави денеска на прес-конференција претседателката на ДКСК, Билјана Ивановска.
Ивановска изнесе дека генералните забелешки утврдени на глобално ниво соодвестуваат и со забелешките за нашата држава, а кои се однесуваат на високо ниво на политичка корупција, недоволна транспарентност во работењето на јавниот сектор и управувањето со судирот на интереси како и недоволен капацитет и неефикасност на контролните и регулаторните тела.
„Според резултатите, најслаби оценки сме добиле од Economist Intelligence unit EU, во делот влијание на политиката врз економијата и бизнисот, 19.79 поени и Varieties of Democracy Project VDP 27.53 поени во делот на демократските процеси“, изјави Ивановска.
Според неа, за надминување на овие состојби треба да се вклучи целото општество, а особено треба да се остави простор за работа на независните тела, како што е и ДКСК.
Една од надлежностите на ДКСК е следење на финансирањето на политичките партии, кој е многу важен сегмент од наодот влијание на политиката во економијата и бизнисот, бидејќи вообичаено главните финансиери на партиите подоцна се јавуваат како економски оператори кои ги добиваат тендерите.
„Постојат ефикасни начини за следење на овие текови на пари, кои за жал сè уште не можеме да ги ставиме во функција, поради проблемите кои веќе цела година ги предочуваме на одговорните во државава, како и на јавноста“, додаде Ивановска.
Таа додаде дека исто така е неопходно и да се зајакне меѓу институционалната соработка, како и да постои ефикаска примена на внатрешни процедури и функционирање на контролниот систем, а како најважен момент, според неа, е подигнување на свеста на сите чинители во општеството, особено оние кои се бават со политика.
Ангела Петровска
