Министерот за економија како надлежен за ресорот туризам и угостителство презентираше неколку факти со кои се демантираат наводите произнесени од дел од угостителите при што информираше дека Министерството за економија е активно вклучено во носењето на сите мерки од страна на Владата на Република Северна Македонија и истите се донесени во соработка со приватниот сектор, односно стопанските комори и асоцијации во нашата држава.
„Сите стопански комори се дел од Координативното тело за туризам и истите активно работат во предлагање на мерки за ублажување на кризата поради коронавирусот кои преку Министерството за економија се предлагаат во Влада. Владата уште во почеток на кризата укажа и имаше целосно разбирање за секторите туризам, угостителство и транспорт и од овие причини првите мерки кои се донесоа ги опфаќаа токму овие сектори со овозможување на истите да искористат бескаматни кредити, субвенционирани придонеси како и намалена каматна стапка за кредити. Свесни сме дека голем број од компаниите од овие сектори се директно опфатени со кризата и од тие причини Владата во вториот пакет на мерки истите ги дополни со нови мерки, односно беа обезбедени дополнителни средства на Развојната банка на Северна Македонија за бескаматни кредити, а исто така им беше овозможено на компаниите да искористат средства за исплата на минимална плата од 14.500 денари за вработен“, потенцираше министерот.
Бектеши потенцираше дека укажувањето дека угостителите нема да ги користат овие мерки се неточни бидејќи според податоците од Развојната банка на Северна Македонија има голем интерес и апликации на компании токму од овој сектор.
„Како министер за економија лично присуствував на состаноците со сите стопански комори каде што барањето за исплата на минимална плата беше клучно за задржување на вработените во овој сектор, за да сега слушнеме од Туристичко-угостителската комора при Сојузот на стопански комори дека нема да ги искористат истите. Очекувавме и како Министерство за економија и како Влада од стопанските комори забелешки или укажувања во делот на подобрување на критериумите за добивање на овие субвенции, но треба да се има предвид фактот дека за нас како Министерство за економија многу е важно истите субвенции да одат кај вистинските угостители, односно угостители кои во минатиот период пред да настане оваа криза редовно ги подмириле сите давачки кон државата“, потенцираше Бектеши и додаде дека за многу брзо време согласно податоците од Државниот завод за статистика се очекуваат извештаите за месец март за да направат споредби и анализи за бројот на работници по индустрии и ќе се констатира дека бројката од 15.000 отпуштени работници во угостителскиот сектор не е точна.
„Мораме да потенцираме дека мерките на Владата за забрана за вршење на дејноста во угостителските објекти е воведена на 14-ти март, додека согласно податоците од државен Завод за статистика месец јануари го завршивме со позитивни бројки во угостителството односно имавме зголемен број на туристи за 12 % додека во текот на оваа недела ги чекаме податоците за февруари месец. Имајќи предвид дека се соочуваме со сериозен светски здравствен проблем најмалку што очекуваме е коректен и неполитизиран пристап од бизнис заедниците во Република Северна Македонија. Aктивно, заеднички сме работеле и ќе продолжиме со работа со сите сектори во изнаоѓање на најдобрите мерки за ублажување на кризата, но без да го загрозиме ефикасното и ефективното работење на државните институции“, кажа министерот.
„Ова не е време за уцени. Многу е јасно дека сите по нешто ќе изгубиме во оваа криза. Работниците од платата, угостителите од профитот. Државата исто ќе има големи загуби. Но, важно е сите да го пребродиме ова. Во туристичко – угостителскиот сектор во државата има над 30 илјади вработени, јасно е дека дел од нив постојано се во обид да работат на црно и постојано се креативни во изнаоѓање на решенија како да избегнат плаќање на давачки кон државата, но инспекторите во целиот свој капацитет и досега, но и отсега па натаму ќе продолжат да го санкционираат таквото работење“, кажа министерот Бектеши.
