ТЕМА НА ДЕНОТ
Пораки од Тирана: Санкции за притисок врз Кремљ, Путин несериозен во врска со мирот
47 лидери од Европа денеска присуствуваат на Европскиот Самит во Тирана. Тие едногласно најавија санкции против Русија и застанаа на страна на Украина. Путин не е сериозен во врска со мирот, ќе бараме безусловно 30-дневно примирје, санкциите се наша алатка за притисок врз Кремљ, беа пораките на Кит Стармер, латвиската премиерка Евика Силина, Урсула Фон дер Лајен, Еди Рама, Марк Руте…
На Европскиот самит учествува и украинскиот претседател Володимир Зеленски, кој доцна синоќа пристигна од Турција.
На Самиот е присутен и премиерот Христијан Мицкоски.
Вчера попладне полицијата во Тирана, од безбедносни причини, одговори негативно на барањето на опозициската Демократска партија на Сали Бериша за одржување протест денеска попладне, кој во синоќешното соопштение наведува дека не се откажува од протестот закажан на стотина метри оддалеченост од местото каде што ќе се одржува Самитот.
ИЗЈАВА НА ДЕНОТ
Фон дер Лајен од Тирана: ЕУ подготвува нов пакет санкции против Русија, Путин избегнува мир
„Санкциите се наша алатка за притисок врз Кремљ. Путин постојано покажуваше дека нема волја за мир. Тој повика на прекин на огнот на 9 мај, но не го спроведе. Украина побара прекин на борбите со поддршка на САД и ЕУ, но предлозите беа одбиени од Русија. Дури и кога беше предложен состанок во Турција, Зеленски прифати, но Путин не се појави. Ова зборува многу“, рече Урсула фон дер Лајен, во рамки на Европскиот самит во Тирана.
РЕГИОН
Додик продолжува со геноцидната реторика: Муслиманите во БиХ повторно сакаат војна; Сакаат да донесат џихадисти и да спроведуваат шеријатски закон; БиХ треба да се распадне
Претседателот на Република Српска, Милорад Додик за австрискиот „Профил“ изјави дека се бори за правата на својот народ, но дека против него и некои српски политичари се христијанин Шмит и муслимани „кои би претпочитале да го стават српскиот народ во концентрационен логор како во Втората светска војна“.
АЛ ПРЕС
Редакциски избор од албански медиуми: Европските лидери од Самитот во Тирана едногласно најавија санкции против Русија; Дијалогот меѓу Косово и Србија неизбежно ќе биде предмет на дискусија Самитот
СВЕТ
Украинските и руските претставници се сретнаа лице в лице во Истанбул, прв пат по три години
Украински и руски претставници се сретнаа лице в лице во Истанбул, ова е прв пат делегати од двете земји да се сретнат лично од 2022 година. Турски претставници, вклучувајќи го и министерот за надворешни работи Хакан Фидан, ги олеснуваат мировните преговори. Трамп, пак, сака да се сретне со Путин „што е можно поскоро“, како што вели државниот секретар Марко Рубио по неговата средба со украинските и турските претставници во Истанбул
ГРАЃАНСКИ ФОРУМ (ПРАШАЊЕ НА ДЕНОТ): Што сакате да им порачате на властите?
СЛОБОДНА ЗОНА
„Еве нас предавниците што ви го вреѓаме славното античкото потекло и бугарското вмровско наследство што ни го напикавте во историјата, што ве гледаме како вазали на Орбан и Вучиќ…. нас ич не нè есапете, ама малку разум и ум купете од модерниот свет, ако не друго, леба ви. Но најн! Упорно се верува на мицковци дека „ќе дојде моментот кога Брисел ќе попушти“, дека „Трамп сега ќе ни среди, нели ние сме наредени први до него пред сите“, или дека „има и други сојузи“ (читај: оска Будимпешта, Белград, Пекинг, преку Москва, или евроазиски некој сојуз)“, пишува Јане Ѓорѓиоски во „Кога дете по 10 години ќе нè праша – Оти не сме во ЕУ?“.
Подготви: Б. Јордановска
