пишува: ЏАБИР ДЕРАЛА
Интересно е да се види што сè се случи за првпат на предвремените парламентарни избори во Северна Македонија на кои победија Зоран Заев и коалицијата што ја состави и ја водеше.
Во исклучително тешки и деликатни услови, Заев на овие избори, истрча на теренот со првата предизборна коалиција што беше вистински мултиетничка – за првпат една од најголемите партии коалицира со партија на Албанците во земјата, заедно со сите други заедници.
И победи. Однесе чиста, иако тесна, победа. Се водеше жестока и валкана кампања веќе две години, не само во текот на изборниот процес, со која се туркаше тезата дека тој што ќе го смени името на државата, ќе биде апсолутен губитник и дека ќе исчезне од политиката. Зоран Заев го докажа токму спротивното и излезе со чиста изборна победа. Голем број граѓанки и граѓани препознаа дека се работи за додавка на името на државата, а не за промена, и дека тоа нè воведе во НАТО, ги отвори портите на ЕУ и ја врати земјата на мапата на прогресивниот свет. Од ФИРОМци – Македонци, со македонски јазик, идентитет и македонска држава…
Заев за првпат го поведе СДСМ во изборна победа од позиција на власт, ако не ги сметаме изборите во 1994 година кога опозицијата ги бојкотираше изборите и му подари апсолутна предност на Бранко Црвенковски.
Во источниот дел од земјата, во повеќе градови со огромно мнозинство Македонци, СДСМ првпат однесе изборна победа. Така, СДСМ победи во Кочани, првпат по 18 години.
За првпат се гласаше во услови на епидемија од коронавирусот. СДСМ посвети голем дел од својата кампања на промоција на мерки за заштита од коронавирусот, што придонесе кон почитување на тие мерки кај најголем дел од гласачите и изборната администрација. Се разбира, во промоцијата на здравствените протоколи помогнаа и неколку невладини организации. Да останеше на Мицкоски и неговиот технички министер, ќе беше сосема поинаку (кафана, теретана, гушкање, стискање)…
Некои медиуми ја прогласија Љатифа Шиковска за прва жена Ромка во парламентот, но, сепак, се работи за втора жена Ромка, по Ѓулистана Марковска (1991 и 1998-2002), иако стои и фактот дека Љатифа е прва Ромка – активистка за човековите права на Ромите која доби место во парламентот.
За првпат видовме кампања со целосна инклузивност и на лицата со посебни потреби. Искрено и во целост, СДСМ ја водеше кампањата придружена со знаковен јазик и со аудио содржини, соодветно на различните категории на лицата со попреченост. Веројатно, оттаму произлезе и отворената поддршка од националните сојузи на лицата со посебни потреби.
Изборите беа џиновски двобој меѓу прогресот и минатото. На едната страна беше Заев (со СДСМ, ребрендиран и со модерен, светски стил), антинационалист, отворен, позитивен, прогресивен и насмеан, со заслуги за влез во НАТО, одмрзнување на патот кон ЕУ, решени спорови со соседите… Од другата страна беше Мицкоски (со ВМРО-ДПМНЕ и огромниот криминален багаж), мрачен, крајно негативен, злокобен, националист, со поглед кон минатото, плачлив… Ни во свое маало не победи, но тоа не е првпат.
За одбележување е и битката на албанските гласачи против речиси дводецениската политичка доминација на ДУИ. Излегоа победници во таа битка, со бројот на освоени места за пратениците Албанци (18 наспроти 15). Наспроти силниот притисок (не е првпат) врз гласачите Албанци, со злоупотреба на јавните ресурси.
За првпат, во Собранието влегува партија со име дијаметрално спротивно на пораките, однесувањето и политиките што ги промовира, но тоа е друга приказна која не заслужува да се раскажува на ова место.
Да се вратиме на Заев… Човекот, откако се појави во политиката, постојано донесува одлуки за кои никој претходно немал храброст и далекувидост ни да помисли на нив, а не, пак, навистина да ги донесе и спроведе. Сосе сите грешки и пропусти, но без исклучок – секогаш во тешки и комплицирани околности.
И сето тоа, без плата. Повеќе од 15 години наназад ја донира во добротворни цели. Ретко кој го знае тоа. Веројатно и тука има некое „првпат“.
Сега, останува да видиме какви политички акробации ќе изведе Заев (некои и за првпат) при составување на новата влада…
Сите права се задржани. ЛИНК: Услови за користење, авторски права и заштита на приватноста. Тесктот е личен став на Авторот.
