ВЕСТ НА ДЕНОТ: СДСМ И ДУИ: Коалициски договор за идна стабилна Влада
СДСМ информира дека за време на викендот и денес продолжиле интезивните работни средби меѓу претставниците на СДСМ и Коалицијата „Можеме“ и ДУИ со цел креирање коалициски договор за идна стабилна Влада.
„Тимовите на СДСМ и ДУИ интензивно работеа на создавање брз и темелен коалициски договор уште во првите денови од уставно определениот рок од 20 дена после добивањето на мандатот. Во разговорите кои се водат на ниво на генерални секретари постигнат е сериозен напредок по однос на речиси сите прашања кои водат до договор за Влада. Со оглед на итноста и потребата од брзо ставање во целосна функција на клучните институции во државата заради справувањето со здравствените и економските предизвици поврзани со Ковид-19, во текот на утрешниот ден ќе се одржи лидерска средба меѓу претседателите Зоран Заев и Али Ахмети на која се очекува конечен договор за нова, стабилна, посветена Влада со мандат од четири години“, стои во нивното соопштение.
ЦИВИЛНИ ВЕСТИ
ЦИВИЛ организира серија панел дискусии и други онлајн настани со заеднички наслов „Национализам“ во вторник и среда, 18-19 август 2020, со почеток во 10 часот, кој ќе се пренесува во живо на Фејсбук страницата на организацијата. Настаните се дел од најновата акција на ЦИВИЛ „Граѓански форум за учество во креирање на владините политики“.
Програмата започнува со едночасовна панел дискусија со универзитетските професорки Мирјана Најчевска и Виолета Петровска Бешка. Со почеток во 11:30 започнува панел дискусијата со Петрит Сарачини (ЦИВИЛ) и Филип Стојановски (Фондација Метаморфозис). Активистите Јане Ѓорѓиоски и Ариан Мехмети ќе разговараат на темата во терминот од 13 до 14 часот, додека Џабир Дерала ќе одржи јавна презентација во 14:30 часот. Во 15:30 часот на програмата е Џевдет Хајредини, експерт за финансии и колумнист.
Граѓанската активистка Виолета Димовска, како одговор на повикот на акција на ЦИВИЛ Граѓански форум за учество во креирање на владините политики, побара од идната Влада подигнување на општата свест за адаптација и навремено и адекватно реагирање на климатските промени.
„Во Македонија многу малку се посветува внимание на воспитно-образовните модели за едукација и самозаштита во предучилишното и основното образование, дури може да се каже дека и е доста занемарено. Во предучилишното образование воопшто не постојат програми за едукација на самозаштита, додека во основното образование се обрнува сосем мал дел и тоа во предмети кои што се изборни а не задолжителни за сите ученици. Импликацијатa е дека ако се случи катастрофа, раното предупредување може да спречи штети од пошироки размери“, вели Димовска.
ФЛЕШ ВЕСТИ
Од Министерство за труд и социјална политика за ЦИВИЛ Медиа велат дека во вчерашниот пожар што избувна во две бараки во Центарот за згрижување бездомни лица во Чичино село нема повредени и дека во тек е увид на екипа на МВР за целосно документирање на случајот.
Државната комисија за спречување на корупцијата ќе испитува дали министерката Нина Ангеловска ја имала информацијата дека Народната банка ќе и ја одземе дозволата на Еуростандард банка кога ги повлекла парите од депозитот или во тој момент не била информирана што ќе се случува.
Првото рочиште за стечајната постапка за „Еуростандард банка“ закажано на 8 октомври
Еврокомесарот Самуел Жбогар во септември заминува од Македонија завршувајќи го четиригодишниот мандат. Своето заминување го најави на социјалните мрежи.
Претседателот на Република Северна Македонија, Стево Пендаровски, преку видео порака се обрати на Летната школа на Меѓународниот семинар за македонски јазик, литература и култура, што оваа година поради пандемијата со КОВИД-19 се одржува дигитално.
СЛОБОДНА ЗОНА
„Сите индикатори укажуваат на ова: и тоа дека секој од нас има сопствена искривена слика за нештата, и тоа дека не можеме да воспоставиме трајни меѓусебни релации (бидејќи сме постојани жртви на илузиите создадени од играта на светлината), и тоа дека луѓето кои доаѓаат однадвор или се смеат или нè доживуваат како чудовишта“, пишува Мирјана Најчевска, во колумната „Искривено огледало“
Б. Јордановска
