ВМРО-ДПМНЕ синоќа ја одржа првата седница на новиот состав на нивниот Извршен комитет. Извршниот комитет донесе одлука за именување на Владимир Нелоски за нов претседател на Градскиот комитет Скопје, Тимчо Муцунски и Владимир Ѓорчев за меѓународни секретари, Иванка Василевска за координатор на централните комисии при ВМРО-ДПМНЕ и избор на Игор Здравковски за претседател на општинскиот комитет на ВМРО-ДПМНЕ Велес.
Христијан Мицкоски завчера истакна дека на седницата на Централниот комитет предложил свикување на вонреден конгрес, на кој би се извршила промена на раководниот состав на партијата, но неговиот предлог бил одбиен.
Костадин Костадинов вчера истакна дека последните случувања во ВМРО-ДПМНЕ се доказ дека внатре во партијата ништо не се променило.
„Тоа е истата таа матрица контролирана директно од Никола Груевски, а спроведувана овде во Република Северна Македонија од страна на Христијан Мицкоски внатре во ВМРО-ДПМНЕ. Кога ќе го погледнете новиот состав на Извршниот Комитет на ВМРО-ДПМНЕ вклучувајќи го тука и Антонио Милошовски и целата таа екипа водена од Никола Груевски, може да заклучиме дека криминалната матрица во белата палата останува“, истакна Костадинов.
Според Богданка Кузеска од СДСМ, таканаречените промени во Извршниот комитет на ВМРО-ДПМНЕ не се ништо освен уште еден очаен обид на Христијан Мицкоски да ја спаси својата фотелја во белиот дворец.
„Во тоа му помага и неговиот ментор, избеганиот осуден криминалец во Будимпешта, Никола Груевски. Меѓу таканаречените освежувања во Извршниот комитет на ВМРО-ДПМНЕ е и Вело Марковски. Марковски ќе остане запаметен по непостојаните ставови во однос на коронавирусот и тоа што често пати јавно ги поткопуваше мерките и решенијата на Комисијата за заразни болести. Во јавни излагања Марковски повикуваше да се заразат што повеќе луѓе со коронвирусот, зборуваше дека вирусот не е опасен и дека студенти по медицина низ светот намерно се заразувале со КОВИД 19“, истакна Кузеска.
A. П.
