Градоначалникот на Општина Крушево, Томе Христоски, одговори на прашањата на ЦИВИЛ Медиа за политичките состојби во земјава по предвремените парламентарни избори, прогнозите за претстојните локални избори и подготовките на локалната самоуправа за интеграции во ЕУ.
ЦИВИЛ Медиа: Која е Вашата оценка за политичките состојби и процеси по предвремените парламентарни избори кои се одржаа во јули?
Христоски: Потребна ни е влада со полн мандат за и ние општините да продолжиме со работа и со остварување на ветувањата дадени до граѓаните. Не ни се потребни повеќе несигурност и нестабилност, доволен предизвик е коронавирусот. Потребно ни е единство, стабилност и ефективна соработка меѓу државните и локалните власти. Ние реализиравме многу со поддршка на централната власт и затоа неопходно да продолжиме со работа во едни нормални услови и да си ја изградиме државата.
ЦИВИЛ Медиа: До локалните избори има околу една година. Кои се Вашите прогнози?
Христоски: Граѓаните се тука да кажат и да не’ оценат. За само 3 години реализиравме приближно 6 милиони евра проекти, но на крајот граѓаните се тие кои ќе кажат што е добро, а што не за нив.
ЦИВИЛ Медиа: Како локалната самоуправа во вашата општина се подготвува за интеграција во ЕУ?
Христоски: Општина Крушево беше активно вклучена во кампањата за референдумот и кампањата насловена како „ЕУ за тебе“. Нашата општина користи многу средства од Европа и благодарение на таквите проекти решивме многу проблеми, реализиравме проекти и го развиваме туризмот. Постојано аплицираме за проекти кон фондови на ЕУ и од интерес за сите граѓани е да продолжиме во таа насока затоа што нашиот буџет е мал и не можеме да си дозволиме финансирање на поголеми проекти. Преку овие проекти ги носиме европските вредности тука и граѓаните се свесни дека нашата определба е ЕУ и НАТО и друг избор нема.
ЦИВИЛ Медиа: колку и на кој начин се почитуваат европските вредности?
Христоски: Мислам дека свеста се зголемува и се повеќе европските вредности ни’ стануваат природни и ги прифаќаме. Има уште работа, но како што реков претходно, мислам дека сме на прав пат.
обработка на текст: Д. Тахири
