Ресен ја продолжува традицијата на заедништво. Децата од македонска, албанска и турската заедница заеднички ќе ја посетуваат новоотворената градинка „Јаболче“.
Грижата за секое дете е врвен приоритет на Владата. Продолжуваме да ги зголемува капацитетите на градинките во целата држава и да вложува во развојот на децата уште од најрана возраст, изјави премиерот Зоран Заев вчера по посетата во Ресен, каде што заедно со министерката за труд и социјални политики, Шахпаска и градоначалникот на Ресен, Гошаревски, ја отворија новата градинка „Јаболче“.
-Заедно со министерката Шахпаска и градоначалникот Гошаревски, ја отворивме новата градинка „Јаболче“ во Ресен. Градинката е пример за концептот „Едно општество за сите“, затоа што тука заедно ќе бидат згрижени деца од македонска, албанска и турска етничка заедница. Градинката е изградена според европски и светски стандарди, онакви во какви што нашите деца треба да растат, да се развиваат и да учат.
Во периодот од 2017 до 2020 година отворивме и проширивме капацитети на 63 објекти низ целата држава, со што обезбедивме згрижување на 3.386 деца. Само во последните три месеци, отворени се 5 нови градинки во Гостивар, Сарај, Илинден, Лозово, Брвеница, еве денеска и Ресен, со што е зголемен опфатот за 415 места. До крајот на годината ќе се отворат и градинките во Куманово, Боговиње, Босилово и с. Прдејци – Гевгелија со што ќе се зголеми капацитетот за уште 189 деца, изјави Заев.
