пишува: ПЕТРИТ САРАЧИНИ
Додека е јавноста згрозена со коментарите полни омраза за пожарот во „Глобал“, д-р Караџоски, самоубиството на дипломатката… да потсетам, иако сум можеби здодевен:
Повеќе од деценија, стотици луѓе во земјава, јавни личности, новинари, интелектуалци, професионалци во различни области, се секојдневни жртви на говор на омраза. Не ретко, тој преоѓал и во вистинско насилство. За тоа нема речиси никаква одговорност. Резултатите на таа неказнивост, но и на молкот и „одобрувањето“ на голем дел на општеството кон омразата, ги гледаме сега во изразена форма.
Но, не се секирајте. Ова што го гледате и од што се згрозувате, доколку нема силна институционална акција, пред сè од заспаните правосудни органи што со години избегнуваат акција во оваа сфера – е само почетокот. Ако вака се продолжи, не ни се далеку „долгите ножеви“, кристалните и вартоломејските ноќи.
Не заборавајте, за коментарите со говор на омраза што ги читате на страници на медиуми, политички партии итн, одговорноста не е само на мразачите, туку и на сопствениците на тие страници, односно оние што ги уредуваат и имаат моќ да бришат или оставаат коментари.
Да потсетам, за ова има и пресуда на Судот во Стразбур, кој им даде за право на естонските власти за изречените казни кон медиумот „Делфи“ за коментари на читатели полни омраза во секцијата за коментари.
Кој е виновен за омразата? Вината е секогаш „несакан“ сирак. Но овојпат мора да и најдеме и „родители“, а и тие родители да понесат одговорност.
Барајте ги виновниците во партиите и политичарите што охрабруваат, с’скаат и хушкаат омраза и насилство. Добро знаете кои се тие.
Барајте ги во медиумите што го прават истото тоа. И тие се добро познати на јавноста. Не се ни трудат да се кријат, туку се горди и се фалат со својата омраза.
Барајте ги во разно-разните јавни личности, кои кога мразат на јавна сцена, добиваат овации и аплаузи (или лајкови, шерови) од опиените онлајн толпи за линч.
Барајте ги во образованието и дел од оние што наместо млади луѓе отворени кон различностите на светот и полни со емпатија, градат неписмени и исфрустрирани мразачи.
Барајте ги и казнете ги виновниците! Пред да биде доцна. Овој вирус и овој пожар гори одамна, а никој ниту гаси, ниту лечи. Згрозувањето одамна не е доволно!
