ВЕСТ НА ДЕНОТ: Примадоната на сваровски судството е разрешена едногласно
Судскиот совет на Република Северна Македонија на денешната седница донесе одлука со која е разрешен судија од вршење на судиската функција поради нестручно и несовесно вршење на судиската функција и истовремено е донесена Одлука за времено оддалечување на судијата од вршење на судиската функција до правосилно завршување на постапката.
Како што изјави претседателот на Судскиот совет, Киро Здравев, по завршувањето на седницата се работи за судијката лидија Неделкова. Таа е разрешена и суспендирана, односно времено оддалечена од извршувањето на судиската функција до правосилноста на одлуката. Неделкова за таа одлука има право на жалба до Судскиот совет.
Постапката против Неделкова се водеше по претставка од веќе разрешениот судија Јово Вангеловски.
Неделкова беше една од тројцата кандидати за претседател на Врховен суд, но Судскиот совет се одлучи за Беса Адеми.
ИЗЈАВА НА ДЕНОТ
Премиерот Зоран Заев за замерките на ВМРО-ДПМНЕ за законот за лични карти изјави: „Тоа знаете како е ‘сакам да водам љубов, ама никако да се прегрнам со партнерот’. Дефинитивно треба да се поддржат вакви работи бидејќи сме мултиетничка држава, јас знам дека има дебати и следам дека тоа може да предизвика одредена дискриминација или не. Ние никогаш не сме се криеле ниту некој од својот идентитет се срамел, напротив, сме се гоордееле и како мултиетничко општество сите се гордееме со етничката разноликост по која сме препознатливи и сме пример за соживот и можат многу развиени земји да учат од нас. Уставот на крајот на денот е Република Северна Македонија и апелирам да дадат поддршка, да не се бараат изговори, затоа што кога поднесувате законско решение не е само договорот од Преспа туку постои и Уставот, а тој вели дека нашата земја е Република Северна Македонија“.
ФЛЕШ ВЕСТИ
На денешната владина седница донесен е петтиот пакет економски мерки наменет за граѓаните и за компаниите, за стабилна и развојна македонска економија и за подобрување на ликвидноста на стопанството. Петтиот пакет содржи вкупно 29 мерки, во вредност од 9,7 милијарди денари или околу 160 милиони евра.
Претстојниот попис на населението, домаќинствата и становите во Република Северна Македонија, освен што како статистичка операција е наша обврска како членка на Обединетите нации (ОН) е од исклучителна важност и поради податоците кои ќе ги добиеме. Ставени во контекст на одредени истражувања и анализи, овие податоци ги даваат потребните контури за креирање ефикасни јавни политики за социо-економски развој, се вели во соопштението на Владата на Република Северна Македонија.
Обвинителката Ленче Ристоска на денешното рочиште за предметот „Таргет-Тврдина“ во завршниот збор детално раскажува како се ваделе „бомбите“ (прислушуваните материјали) од УБК. Нејзиниот излагање го почна со потсетување дека земјата веќе има две афери со прислушување, во 1992 и во 2000 година, за кои никој не одговарал. Хронолошки, потоа стигна до 2008 година, кога и почнуваат дејствијата во предметот.
Комуникацијата со бугарската страна очекувам да продолжи во наредните денови и да го финализираме текстот на Акцискиот план, кој е фокусиран на секторската соработка помеѓу линиските министерства како и евентуално да го утврдиме датумот за одржување на втората меѓувладина седница, чии домаќини овој пат сме ние, изјави денеска министерот за надворешни работи Бујар Османи.
СЛОБОДНА ЗОНА
Сашо Орданоски во колумната „Од Софија, со љубов, виа Табановце!“, пишува: „Гледате, ова Вучиќ го знае „од мали нозе“, го има „цицано“ уште додека учеше политика од Шешељ, па кога Бугарија толку евтино, практично бесплатно ќе му ја „сервира“ Македонија на анти-европска тацна, Вучиќ треба да е будала за да не седне во автобус до Табановце и, со една кутија вакцини, да ги зацврсти сите просрпски стереотипи во Македонија.
Вучиќ не само што не е будала, туку е многу опасен во таа своја вештина да изгледа жовијално будалесто, додека крои регионална политика не само подобро од онаа на Бугарија, туку и од самата ЕУ, што им ја дозволува на Бугарите оваа анти-европска балканска авантура“.
Елена Гаговска во колумната „Лажните вести и квазиинтелектуалниот хетеросексизам на Венко Андоновски“, пишува: „Во општеството каде авторитетот на машкиот интелектуалец се смета за извор на апсолутна вистина, навистина не е мала работа еден професор кој има илјадници читања на своите колумни, да пишува написи базирани на лажни вести и застрашувачки репрезентации на ЛГБТИ заедницата. Без разлика дали тој сака да признае, Андоновски има голема платформа и авторитет кои ги користи за ширење дезинформации, омраза и шовинизам и тоа е крајно опасно“.
Д.М.
