ВЕСТ НА ДЕНОТ: Почнува попишувањето на иселениците, дипломатите, затворениците и бездомниците
Првата фаза од Пописот на населението, домаќинствата и становите почнува денеска со попишување на вработените во дипломатско-конзуларните претставништва и нивните семејства, на дијаспората, припадниците на армијата во странство, затворениците и бездомниците. Оваа активност ќе трае до 21 април, кога и официјално треба да заврши пописот, што ќе започне на 1 април.
Министерството за надворешни работи ќе спроведе медиумска кампања за мотивирање на лицата за самопопишување/саморегистрација, отсутни во странство: на работа во ОН и нејзините организации, претставништва или претставници на стопанските комори во странство, деловните единици во странство, воени претставници на Армијата во странство и студентите и граѓаните што се ангажирани од страна на Република Северна Македонија врз основа на меѓународна, техничка и друга соработка, како и членовите на нивните семејства/ домаќинствата што престојуваат во странство со наведените лица. Овде спаѓаат и сите лица – државјани на Република Северна Македонија кои по која било основа престојуваат во странство, без оглед на должината на нивниот престој
ИЗЈАВА НА ДЕНОТ Брнз: Овие пушки ќе ја зајакнат интероперативноста, не само со САД, туку и со другите сили на НАТО
Брнз: Ви благодарам министерке Шеќеринска и генерал Нуредин што се со мене денеска тука да ја одбележиме донацијата на 1269 автоматски пушки, во вредност од 1,2 милиони долари, како поддршка на лесната пешадиска баталјонска група. Ова е уште еден пример за тоа како работиме заедно за да бидеме сигурни дека нашите сили, кога ќе се борат заедно, и кога ќе се обучуваат заедно, ќе бидат интероперативни, и овие пушки ќе ја зајакнат интероперативноста, не само со САД, туку и со другите сили на НАТО. И, како што слушнавме од лидерите, ова ќе биде многу важно, и ќе биде влијателно за понатамошните активности. Ова е уште еден доказ на нашата долготрајна одбранбена соработка, што уште повеќе е зајакната со потпишувањето на Меморандумот за соработка во одбраната минатата недела, но, ова претставува и обврска на вашата земја за модернизирање на македонската армија, изјави Амбасадорката на САД, Кејт Мари Брнз на примопредавање на американска донација од 1.269 автоматски пушки М-4 за потребите на Армијата на Република Северна Македонија.
ЦИВИЛНИ АКТИВНОСТИ
Панел на ЦИВИЛ во Штип: Пописот е статистика, а не политика
Во согласност со мерките за заштита од Ковид-19, панел дискусијата ќе биде одржана без публика, но ќе биде пренесувана во живо на Фејсбук страницата на ЦИВИЛ, а содржините што ќе произлезат од панел дискусијата ќе бидат објавени на медиумската платформа на организацијата на македонски, албански и англиски јазик. Посебни видео прилози ќе бидат објавени и на YouTube каналот на ЦИВИЛ. Како и секогаш, редакциите со кои ЦИВИЛ има соработка се поканети да ги преземат сите медиумски содржини со соодветна атрибуција и линк.
Во фокусот на панел дискусијата е потребата да се одвои политиката од статистиката, бидејќи пописот тоа и е – статистичка операција, а не полигон за етно-политички пресметки. За јавноста е важно да се слушнат ставовите и на штипските учеснички и учесници во панел дискусијата на кои, меѓу другото, ќе им дадеме простор да споделат и некои основни информации за текот на подготовките на пописот, како и неговото значење за развојот на општините, економијата, стопанството и градењето политики и практики на локално и национално ниво.
ФЛЕШ ВЕСТИ
Попис – Министерот за правда Бојан Маричиќ, заедно со директорот на Државниот завод за статистика Апостол Симовски и директорот на Управата за извршување санкции Марјан Спасовски денеска ќе извршат увид во текот на попишувањето во Казнено-поправната установа К’шање, Кумановско.
Реконструкција – Објектот на Универзалната сала во Скопје ќе се реконструира во постојниот облик и габарит, задржувајќи го својот автентичен изглед како симбол на обновата на постземјотресно Скопје. На промоцијата на изведбениот проект за реконструкција на Универзална сала присуствуваа премиерот Зоран Заев, градоначалникот на Град Скопје Петре Шилегов, директорот на Универзална сала Филип Аврамчев, архитектот Бујар Муча од архитектонското биро „Мегарон Инженеринг“, кој го изработи овој проект
Дезинформации – Од Катедрата за македонски јазик и јужнословенски јазици, при Филолошки факултет „Блаже Конески“ – Скопје реагираат дека се целосни невистини и манипулации тврдењата на претседателот на Македонската академија на науките и уметности, Љупчо Коцарев, кој во јавноста изнесе тврдења дека ќе се укинуваат катедрите по македонски јазик и македонска книжевност
Правда – Заев: Доколку имало пропусти, одговорност за случајот со Мијалков ќе има
Поради изолација на членот на Судскиот совет, Огнен Ставрев, кој имал контакти со лица позитивни на Ковид-19, за денеска најавеното рочиште за предметот „Титаник“ е одложи за 17 март.
СЛОБОДНА ЗОНА
„ Во таа насока, сегашните предлози на Георгиевски не прават никакво унапредување на софиската агенда во Македонија, туку само ги дезавуираат напорите на Османи и Бучковски да се „стави ред“ во високо-подигнатите емоции меѓу Софија и Скопје. Можно е Бугарија, со право, да проценила дека процесот почнува да се одвива во за нив неприфатлива насока: откако меѓународно се посрамотија и останаа осамени со билатералното вето за Македонија (и за Албанија), притисокот врз нив од Брисел и Вашингтон може само да расте во насока на компромис, ама не со максималистичката агенда „à ла Георгиевски“, пишува Сашо Орданоски во колумната „Бугарите се плашат од нов „Преспански“ договор“
„Прво се договоривме дека општествената сопственост не е ефикасен основ за раководење на економијата. И договорот падна, прво да ја подржавиме, а потоа да ја приватизираме. Имаше разни предлози околу моделот на приватизација за кој ќе требаше да се договориме и штетата да биде помала и светлата иднина да биде поблиску. И договорот донесе резултати какви само ние можеме да испорачаме. Од вредност на економијата од девет милијарди долари за три години ја сведовме на шест, а кон крајот на деценијата на само три милијарди долари. Никој како нас не умее да се договара така ефикасно на сопствена штета“, Војо Маневски, во колумната „Договарање“
„Ништо на светот не е полесно отколку да направите глупава толпа на луѓе да ве сака. Дајте ја лопата на знамињата, вметнете вера и молитва, навивајте за нашите, вжештете ги митовите, внесете омраза кон другите народи, плукајте по бегалците, исмејувајте жени, давајте некои теории на заговор за злобниот свет фокусиран на мал, но искрен Хрват, кој на сите им пречи- и малиот човек е на твоја страна. Полесно е да усреќите мал човек отколку свиња, верата и нацијата се поевтини од товењето. Но како тогаш да се погледнеш во огледало?“, пишува Матија Бобиќ, основач на Индекс.хр во колумната Полесно е да усреќите мал човек отколку свиња, верата и нацијата се поевтини од товењето
Д. Тахири
