На Армискиот полигон Криволак денеска беа презентирани моделите на лесните тактички оклопни возила на производителот „Oshkosh Defense“ за кои е планирано да станат составен дел од капацитетите на Армијата на Република Северна Македонија.
На презентацијата меѓу другите беа присутни и министерката за одбрана Радмила Шекеринска и заменик-началникот на Генералштабот генерал-мајор Азим Нуредин.
Заменик-началникот на ГШ на Армијата на Република Северна Македонија нагласи дека еден од клучните фактори за модерна и ефикасна армија способна за извршување на мисијата од Уставот на Република Северна Македонија и успешно извршување на мисиите во рамки на НАТО е опременоста.
– Генералштабот заедно со Министерството за одбрана навремено ги согледа потребите за модернизација и опремување на Армијата на Република Северна М што паралелно со проекциите за буџетот и планот за трансформација се правени проекции за потребните материјално-технички средства и борбена опрема. По полноправното членство во НАТО со добивање со пакетот на цели на способности и квалитативни цели јасно ги дефиниравме очекувањата и приоритетите за опремувањето и модернизацијата на Армијата, процес што се одвива и ќе се одвива согласно предвидената динамика, а врз основа на долгорочниот план за развој на одбранбените способности 2019-2028 и согласно Законот за јавни набавки во областа на одбраната и безбедноста, рече Нуредин.
Тој нагласи дека опремувањето со современи борбени возила од овој вид е од клучно значење за доизградба на постојните и за развивање на нови способности и капацитети во процесот на трансформацијата на Армијата на Република Северна Македонија, како и постигнување на потребен степен на интероперабилност и компатибилност со вооружените сили на останатите земји членки на НАТО.
Како еден од поголемите капитални проекти, наведе Нуредин, е проектот за опремување на лесната пешадиска батаљонска група со лесни оклопни возила на тркала, со што единиците ќе ги подобрат своите способности за распоредливост, мобилност, маневар, заштита на персоналот и зголемување на огнената моќ на единиците.
– Врз основа на претходно споменатите долгорочниот план за развој на одбранбените способности и согласно Законот за јавни набавки во областа на одбраната и безбедноста во 2019 година Владата на РСМ и Владата на САД потпишаа Договор за набавка на 33 лесни оклопни возила на тркала од овој тип при што првите ги очекуваме веќе следната година, информираше Нуредин.
Тој соопшти дека е планирано опремување на единиците во состав на ЛПБГ во две фази при што во првата фаза до крајот на 2024 година со 151 лесно оклопно возило на тркала, а во следните три години уште 98 возила.
Модернизацијата на Армијата не запира. По новата лична опрема, спортска и алпинистичка опрема, АБХО, гортекс одела, инженериските машини, влечни возови, дел од армиските капацитети ќе станат и овие нови лесни оклопни возила од американско производство. Денес на Криволак се уверивме во нивните исклучителни перформанси. Така ја личи нашата Армија во НАТО, напиша министерката за одбрана Шекеринска на својот Фејсбук профил.
