Во денешното, празнично, прво издание на прегледот на изборните активности на политичките партии и независните кандидати на локалните избори се забележува намалена, поради одбележувањето на 30-те години независност на нашата држава. Сепак, имаме неколку информации за претставување на кандидати на СДСМ од синоќешните средби со граѓаните, претставување на кандидат на АА-А за Липково, трибина со изборен контекст на ВМРО-ДПМНЕ во Битола, како и одлуката на Демократски сојуз (ДС) на локалните избори да оди во коалиција со СДСМ. Објавите на независните кандидати и листи од „Шанса за Центар“ и „Зелен хуман град“ на нивните Фејсбук профили се сведуваат на честитки по повод празникот.
ПРЕСВРТНИЦА ВО „НОВАТА ПОЛИТИЧКА СИЛА“, ДС СЕ ВРАЌА ВО КОАЛИЦИЈАТА СО СДСМ
Демократскиот сојуз на Павле Трајанов, на седницата одржана на 7 септември, врз основа на темелни анализи, сондажа на јавното мислење и изборните правила, како и програмските определби, донесе Одлука на претстојните локални избори да настапи заедно со СДСМ.
Ова е пресвртница во политичкото однесување на ДС, бидејќи Трајанов во април говореше дека неговата коалиција со ДОМ и ЛДП претставува „нова политичка сила“.
НЕЗАВИСНИ
Независните кандидати за градоначалници и советнички листи од „Шанса за Центар“ и „Зелен хуман град“ на нивните Фејсбук профили денеска немаат изборни активности, и објавуваат честитки по повод празникот 8 септемри.
ПРЕТСТАВУВАЊА
ВМРО-ДПМНЕ денеска (8 септември) на терасата во хотел „Епинал“ во Битола одржа трибина „30 години се грижиме за Македонија“, на која учествуваа поранешните министри Мартин Тренески и Маријан Ѓорчев, поранешниот скопски градоначалник Коце Трајановски, поранешниот технички премиер Емил Димитриев и поранешниот градоначалник на Битола Златко Милошески, каде главна тема во обраќањата на присутните беа локалните избори и учеството во нив.
СДСМ на синоќешните средби (7 септември) со граѓаните претстави дел од своите кандидати. Министерот за здравство Венко Филипче во Штип го претстави актуелниот градоначалник Сашко Николов како кандидат на СДСМ за претстојните локални избори. Потпретседателот на партијата, Фатмир Битиќи, беше дел од промоцијата на кандидатот за градоначалник на општина Гевгелија, Сашко Поцков.
Алијансата за Албанците и Алтернатива синоќа (7 септември) го претставија својот кандидат за градоначалник на Липково, универзитетски професор по науки за национална безбедност, Арсим Идризи, кој пред граѓаните изјави дека ќе работи првенствено за безбедноста на граѓаните, за подобрување на социјалната благосостојба, сигурноста во образованието, економските инвестиции, здравството.
ДА ПОВТОРИМЕ
Во рамките на својот долгорочен изборен мониторинг, ЦИВИЛ и Редакцијата при медиумската платформа, редовно ги бележат настаните на различните учесници во изборната трка. Организацијата неодамна ги повика политичките партии и независните кандидати редовно да ја известуваат организацијата и нејзината медиумска платформа за своите активности. Дел од учесниците во изборната трка сè уште не одговорија на повикот.
Д. Мишев
