Денот на независноста, покрај прославата, за жал го одбележа трагедија во Тетово во која го загубиле животот до сега потврдени 14 лица, а десетици се повредени.
Денешното попладневно издание на изборната хроника се однесува на настаните во текот на вечерта (8 септември) до 16 часот денеска (9 септември). Вчера вечерта, пред да се случи трагедијата во Тетово, Алијанса за Албанците и Алтернатива промовираа кандидати за градоначалници, СДСМ потпиша коалиција со 20 партии, Шанса за Центар ја поднесоа листата во ДИК, а ВМРО-ДПМНЕ имаше неколку јавни објави во дуел со СДСМ.
ТРИДНЕВНА ЖАЛОСТ, СЕ СОПИРААТ СИТЕ ЈАВНИ АКТИВНОСТИ
Владата донесе одлука да биде прогласена тридневна жалост на територијата на целата држава денеска, утре и задутре (четврток, петок и сабота), по синоќешниот пожар во модуларната ковид болница во Тетово во која загинаа 14 лица.
Од Владата апелираат до сите општествени чинители да ги одложат сите јавни и приватни прослави, забави, културно-уметнички и спортски настани, партиски и друг тип на промоции предвидени за овие три дена.
ВМРО-ДПМНЕ ги одложи јавните настани поврзани со локалните избори денеска, утре и задутре (четврток, петок и сабота).
ДУЕЛИ
СДСМ потпиша Договор за заеднички настап на претстојните локални избори со 20 политички партии. Како што изјави лидерот на СДСМ, Зоран Заев по заедничката средба во партискиот штаб, дефинирани се соработки на повеќе нивоа, заеднички советнички листи и 69 градоначалници.
„Ова е коалицијата „Најдоброто за мојата општина“, фаворит, победник на изборите. Имаме знаење, волја и мотивација, план и програма за решавање на проблемите на граѓаните. Принципите зад кои заеднички застануваме се препознатливиот печат – работа во интерес на сите“, истакна Заев.
Според него, Коалицијата на изборите ќе има широка кадровска понуда во првиот и вториот изборен круг.
ВМРО-ДПМНЕ експресно ја нападна коалицијата на СДСМ со 20-те партии, нарекувајќи ја „коалиција на лузери“.
„Раситнетата коалиција каде ги нема БЕСА, ЛДП, ДОМ, партијата на Турците, партијата на Бошњаците е коалиција за пораз, и тоа покажува дека Заев си одбра друштво во кое ќе доживее пораз.
Заев е најдобро да си замине. Заев е најдобро да се повлече. Заев е најлошото во земјата. Заев остана со Тито Петковски, Павле Трајанов и Стојанче Ангелов“, велат од ВМРО-ДПМНЕ.
ПРЕТСТАВУВАЊА
Актуелниот градоначалник на Општина Кочани, Николчо Илиев е кандидатот на СДСМ и Коалицијата „Најдоброто за мојата општина“ за градоначалник за претстојните локални избори, истакнувајќи дека со тоа ја комплетираат понудата од 69 кандидати за градоначалници.
Алијансата за Албанците и Алтернатива ги претставија своите кандидати за градоначалници во Општините Дебар, Гостивар, Желино и Струга.
Актуелниот градоначалник, д-р. Арбен Таравари е кандидат за уште еден мандат на Општина Гостивар. Во Дебар ќе настапат со д-р. Беким Поцеста, во Струга со Идри Истрефи и во Општина Желино ќе настапат со Махир Зибери.
НЕЗАВИСНИТЕ ПОДНЕСОА ЛИСТА НА ДЕНОТ НА НЕЗАВИСНОСТА
Шанса за Центар поднесоа кандидатска листа во Државната изборна комисија.
„Први собравме потписи, први ја поднесовме листата во ДИК на денот на нашата државност. Нека ни е честит празникот на сите. Градоначалникот не може ништо да одлучи ако тоа не го одобри советот. Силен совет значи силна општина! Имаме #ШансаЗаЦентар за да ги смениме работите. Заедно со граѓаните можеме многу повеќе!“ – изјавија претставниците на оваа коалиција.
ДА ПОВТОРИМЕ
Во рамките на својот долгорочен изборен мониторинг, ЦИВИЛ и Редакцијата при медиумската платформа, редовно ги бележат настаните на различните учесници во изборната трка. Организацијата неодамна ги повика политичките партии и независните кандидати редовно да ја известуваат организацијата и нејзината медиумска платформа за своите активности. Дел од учесниците во изборната трка сè уште не одговорија на повикот.
Д. Муратов
