Пожарот во тетовската модуларна болница, во кој загинаа 14 лица, продолжува да ја распламтува политичката сцена. Лидерот на опозициската ВМРО-ДПМНЕ, Христијан Мицкоски денеска од Тетово, по средбата со синовите на едно од починатите лица во пожарот, побара независна истрага и одговорност од Зоран Заев, Венко Филипче и Илир Хасани.
Лидерот на СДСМ, Зоран Заев ги обвини лидерите на најголемите опозициски партии, Христијан Мицкоски и Зијадин Села, за политикантство во случајот со трагедијата во Тетово.
Лидерот на Алијанса за Албанците, Зијадин Села, преку Фејсбук му одговори на премиерот Зоран Заев дека е „за жалење“.
ПОЖАРОТ ВО ТЕТОВО ЈА РАСПЛАМТИ ПОЛИТИЧКАТА СЦЕНА
Лидерот на СДСМ, Зоран Заев ги обвини лидерите на најголемите опозициски партии, Христијан Мицкоски и Зијадин Села, за политикантство во случајот со трагедијата во Тетово и им порача дека за да дојдат на власт, прво тоа треба да го заслужат тоа.Тој додаде дека не размислува да даде оставка.
„Зошто да дадам оставка? Мицкоски да дојде и да биде премиер? Не размислувам, затоа што тој ќе биде премиер и заменик-премиер ќе биде претседателот на Алијанса кога ќе заслужат, кога ќе имаат емпатија со народот, кога ќе бидат тука да помогнат, кога ќе даваат идеи. А не вака грозотијата да ја користат на најлош начин, кога целата наша нација е во длабока болка и црнило. И тоа во трите дена на жалост без да калкулираат за чувствата на семејствата, на децата, на родителите, на сите нас. Болката е искрена кај сите нас и тоа го гледаме. Пуста желба за власт, пусто само да се победи. Нема да се победи. Сè додека вака се однесуваат, ќе губат на избори затоа што другата алтернатива е заедништвото, инвестициите …“, рече Заев.
Претседателот на ВМРО-ДПМНЕ, Христијан Мицкоски денеска беше во тетовското село Нераште заедно со пратеникот Александар Велјановски, каде изразија сочувство на синовите на една од 14-те лица кои ги загубија животите во пожарот во модуларната болница минатиот петок. Лидерот на опозицијата ја коментираше изјавата на премиерот Зоран Заев дека нема да поднесе оставка за настанот, при што најави дека како опозиција ќе преземат чекори на таа тема.
„Навистина кога човек ќе се поистовети со функција и кога себеси ќе се интерпретира со функција тоа сум јас, во услови кога невини човечки животи згаснаа е тажна и жална. Доколку тој човек не чувствува ни малку морална одговорност и тоа се обидува да го интерпретира дека ако тој замине, а Мицкоски ќе бил премиер тогаш навистина освен она чувство на гадење кое што во овој момент го имам друго немам што да кажам. Додека министерот за здравство кој што е најодговорен за овој случај таму каде што е, до кога неговиот заменик е таму каде што е, додека овие луѓе ја водат Владата не очекуваме непристрастна истрага. Каква истрага збориме, имаме објект кој без дозвола за употреба е пуштен во употреба. Немаме инсталации за против пожарна заштита. Јас сум инженер, констатирам, што треба понатаму да констатираме повеќе“, изјави Мицкоски.
И лидерот на Алијанса за Албанците, Зијадин Села, преку Фејсбук му одговори на премиерот Зоран Заев на изјавата.
„За жалење си премиере, толку многу ве заслепи власта што не оставивте вредност во чие име дојдовте на власт, без да ja прегазите. Но, не заборавајте едно, не сме сите исти. Тешко е да ја разберете суштината на оставката, бидејќи вие тоа го немате во себе. А тоа е совестa и моралот, а не власта“, му порача Села на Заев.
КОАЛИЦИСКА ПОДДРШКА
Лидерот на ВМРО-ДПМНЕ, Христијан Мицкоски, истакна дека ВМРО-ДПМНЕ во Тетово ќе го поддржи кандидатот за градоначалник на коалицијата Алијанса за Албанците и Алтернатива, додека, како што рече, советничката листа на ВМРО-ДПМНЕ ќе освои рекорден број на советници во советот на Тетово, а нивната заедничка цел е пораз на криминалната коалиција на власт СДСМ-ДУИ. По победата, потоа очекува луѓето од централната власт достоинствено да ги напуштат функциите и да им ги препуштат ним.
