Притисоци и злоупотреба на службена положба од раководител на образовна установа кој преку СМС пораки ги повикувал вработените на „задолжително присуство“ на партиски митинг. Продолжува црната и навредливата кампања. Децата се почесто на партиските собири седат до или во скутот на политичките лидери и кандидатите за градоначалници.
Притисоци и злоупотреба на службената положба
СМС пораки со назнака дека „присуството е задолжително“ на предизборен собир на Демократската унија за интеграција испраќал раководител до вработените во една образовна установа. ЦИВИЛ располага со доказ за пораката од телефонскиот број на раководителот на образовната установа.
Ваква СМС порака добиле и други вработени од установата, а под зголемен притисок биле оние што немале решенија за постојан работен однос, на кои им било упатено „потсетување“ дека треба да се докажуваат за да го задржат работното место, вели лицето што го пријави случајот.
Говор на омраза, добро организирана црна пропаганда
ЦИВИЛ секојдневно бележи и архивира случаи на говор на омраза, дезинформации и манипулации со фактите кои се лиферуваат на социјалните мрежи и во дел од медиумите. Дел од објавите на социјалните мрежи кои доаѓаат претежно од редовите на опозицијата, пред сè, ВМРО-ДПМНЕ и Левица, содржат навреди или манипулации чија цел е предизвикување говор на омраза во коментарите и дискредитација на политичките противници.
Честа мета на навреди, говор на омраза, манипулација со фактите или чисти измислици се и граѓанските организации, вклучително и ЦИВИЛ. Многу често, не се коментираат фактите во содржините, вестите и извештаите на ЦИВИЛ, туку се менува темата или директно се изнесуваат невистини, навреди и омраза во коментарите.
Продолжува политичка злоупотреба на деца
Злоупотреба на деца се бележи во случајот на лидерот на ВМРО-ДПМНЕ, Христијан Мицкоски и кандидатот за градоначалник Тони Михајловски со фотографии на митингот на ВМРО-ДПМНЕ во Куманово на 27 септември.
Политичка злоупотреба на деца се бележи и во случајот со лидерот на Партија за демократски просперитет на Ромите (ПДПР), Аксел Ахмедовски, кој објави фотографии со деца на Фејсбук во изборен контекст на 30 септември.
ГРАД СКОПЈЕ
Актуелниот градоначалник и кандидатот на СДСМ за Град Скопје, Петре Шилегов, истакна дека ова се избори помеѓу политика на континуитет што води кон друштвото на развиените градови или враќање кон лажните митови и криминалот кои нѐ уназадуваа со години!
„Скопјани и скопјанки ќе одберат развој и континуитет на нашиот град, затоа што луѓето се над политиката. Скопје е над политиката. Во Скопје сите сме подеднакво важни, без оглед од кое негово место доаѓаме, и во периферијата и во центарот“, истакна тој.
Скопскиот градоначалник информира дека градежната офанзива нема да запре, со проширувањето на булеварот „Борис Трајковски“ накај Драчево ќе се олесни протокот на возила бидејќи таму гравитираат околу педесетина илјади жители – кажа градоначалникот на Град Скопје Шилегов, кој денеска беше таму на увид. Паралелно вели се работи и во општина Ѓорче Петров, а се имплементира и брзиот трамвајски превоз.
И лицерот на ВМРО-ДПМНЕ, Христијан Мицкоски присуствуваше на презнтацијата на програмата на кандидатката Данела Арсовска. Таа ветува дигитален град, зелени политики, модерна инфраструктура.
„Во областа на економијата, ќе овозможам иницијатива за креирање на меѓународен проект за првиот информатичко – иновациски парк во државата, Скопје ИНОПАРК – современа и иновативна инфраструктура наменета за развој на високо технолошки компании и креативни тимски работни процеси на старт ап компании. Потоа следува спроведувањето на идејата за дигитален град – SMART СКОПЈЕ со што се опфаќа проширување на оптичката мрежа во градот, паметни системи за наводнување и осветлување на јавните простори. Третата област е еколошката мобилност и креирањето модерна инфраструктура за велосипеди со креирање на нови велосипедски патеки за безбедно поврзување на сите делови од градот. Како четврта клучна област е образованието и фокусот на младите, со што се обврзувам да биде предводник во изградба на модерна образовна инфраструктура и современи услови за учење според ЕУ стандарди“, вели Арсовска.
АЛИЈАНСА ЗА АЛБАНЦИТЕ
Алијанса за Албанците и Алтернатива реагираат дека во четвртокот вечерта, неколку билборди со ликот на нивниот кандидат за Тетово, Вулнет Мурсели, беа уништени.
„Ваквите вандализми се срамни намери на неуспешни индивидуи во политиката со намера да ги вовлечат во нивното срамно оро нашите активисти. Ги уверуваме симпатизерите, гласачите, но, посебно сите граѓани на Тетово и околината дека коалицијата Алијанса за Албанците и Алтернатива и тимот на Вулнет Мурсели не паѓаат на нивото на тие што ги опфатил страв и паника од губење на изборите кое ги очекува.
Очекуваме од истражните органи и тие на обезбедувањето на ред и мир да го расветлат ова срамно дело и сторителите да бидат казнети според законот и кривичниот законик“, велат од Алијанса и Алтернатива.
СДСМ
Претседателот на СДСМ, Зоран Заев вели дека Мицкоски постојано зборува за минатото, сака да си се вратат во минатото – тоа е за него новата иднина.
„Стари режимски кадри и нова иднина не одат заедно! Не може луѓе свртени кон минатото да реализираат иднина. И тие, петтоцифрените бројки со коишто се расфрлаат – за Мицкоски и ВМРО-ДПМНЕ не се проекти, пари се, за во нивните џебови, за провизии, тајни набавки и криминали. Само тоа ги интересира – власт и моќ. Никогаш повеќе да не се повтори режим. Додека не се реформира ВМРО-ДПМНЕ не може да ја добие довербата од граѓаните на кои било избори“, вели Заев додавајќи дека во меѓувреме, СДСМ го продолжува развојот на домашен план со проекти на домашен план, во општините и натамошно интегрирање на државата на меѓународен план.
ВМРО-ДПМНЕ
Лидерот на ВМРО-ДПМНЕ, Христијан Мицкоски пак вели дека иднината со СДСМ не е иднина. Тоа е иднина на статус кво.
„Иднината со СДСМ е иднина без проекти, без конкретни чекори, со паушални постапки и импровизации, иднина во која нивниот збор ќе вреди како досега, едно големо ништо. Затоа јас ќе продолжам да се борам без разлика на сѐ. Да бидеме истрајни! Овие избори се шанса за промени, шанса за подобро утре.
За тоа каде сме сега најдобро говори тоа што може да се чуе на митинзите на власта. Ништо ново, ништо прецизно. Старите обвинувања, старите фрази и старите лаги. Ова се избори на кои се одлучува во каков правец ќе продолжи нашата држава“, велат од ВМРО-ДПМНЕ.
ДУИ
Под мотото „Избери живот, гласај зелено“, Демократската унија за интеграција денеска ја претстави изборната програма за општина Арачиново.
Кандидат за градоначалник на ДУИ, Ридван Ибрахими, истакна дека главните столбови на програмата за подобар живот за Арачиново се подобрувањето на патната инфраструктура, грижата за водоводната и канализационата мрежа, подигнување на нивото на јавна чистота, поголем квалитет во областа на образованието, зајакнување на механизмите за поголема здравствена и социјална благосостојба. Ибрахими, меѓу другото, нагласи дека неговиот фокус во новиот четиригодишен мандат ќе биде особено решавање на проблемот со водоснабдувањето, преместување на депонијата од Арачиново и регулирање на главниот пат во форма на булевар, но исто така и други проекти што ќе овозможат стандарден подобар квалитет на живот за жителите на Арачиново.
ЛОКАЛНИ ИЗБОРИ:
- Караванот „Најдоброто за мојата општина“ денеска е меѓу граѓаните на Градско, Чашка, Велес и Илинден.
- Коалицијата предводена од ВМРО-ДПМНЕ ќе ја претстави изборната кампања „Создади нова иднина!“ во повеќе населени места: Демир Хисар, Новаци, Могила и на плоштад „Магнолија во Битола.
- Маалска средба на „Зелен хуман град“ и Ана Петровска со жителите од Драчево
- Изборни активности на Движењето Беса во Струга.
- ДУИ денеска ќе ги одржи своите предизборни митинзи во Хасанбег и Арачиново, каде на граѓаните ќе им ги претстави изборните програми за овие две населени места.
Д. Муратов
