И вечерва лидерите на политичките партии беа „ѕвезди“ на митинзите за локалните избори кои ќе се одржат на 17 октомври. Лидерот на ВМРО-ДПМНЕ, Христијан Мицкоски се истакна со пораката дека е за „чиста“ Македонија, но „исчистена од криминалци“. Лидерот на СДСМ, Зоран Заев го најави Интервентниот план за инвестиции – кој е над осум милијарди евра.
ИЗБОРНИ ИНЦИДЕНТИ
Жител на светиниколското село Каратманово пред два дена сакал да го нападне градоначалникот на општина Лозово, Ацо Велковски, соопшти МВР.
„На 02.10.2021 околу 17.20 часот во ОВР Свети Николе А.В., градоначалник на општина Лозово, пријавил кривично дело „загрозување на сигурноста” во с.Каратманово, светниколско, од страна на С.С.(47) од ова село, кој во с. Каратманово тргнал кон него со метален предмет. Се преземаат мерки за расчистување на случајот“, се вели во полицискиот билтен.
ПАРТИСКИ АКТИВНОСТИ
ЛДП – ДОМ
Кандидатот за градоначалник на Град Скопје на граѓанското движење на центарот на ЛДП и ДОМ, Бени Шакири вечерва го отвори градскиот промотивен штаб.
„Доколку бидам избран ќе работам посветено и ќе бидам градоначалник на сите граѓани на Градот Скопје без разлика на нивната партиска, национална, верска и било која друга припадност“, порача Арбен Бени Шакири, кандидатот за градоначалник на Град Скопје од Коалицијата „Одлучно за промени” на ДОМ и ЛДП на официјалното отворање на Градскиот штаб на Коалицијата.
ВМРО-ДПМНЕ
Претседателот на ВМРО-ДПМНЕ, Христијан Мицкоски денеска на митингот во Радовиш порача дека големите одлуки зависат од народот, повикувајќи да излезат и да покажат дека се за иднина која заедно ќе ја создадат.
„Драги радовишани затоа излезете на овие избори и гласајте. Затоа што ако не излезете и не гласате, тогаш ќе мислат дека ја водат државата исправно и ќе продолжат ве злоупотребуваат вас и вашата добрина. Со молчење сите ние стануваме соучесници во нивниот грабеж на Македонија. Тие сакаат да останете дома, вие покажете жилавост и излезете да гласате. Големите одлуки зависат од народот. Ова се моменти да се биде гласен. Нашиот народ знаел да биде гласен многу пати во минатото“, потенцираше Мицкоски.
Тој рече дека Заев веќе се разделил со многу партнери од коалицијата, Либерално-демократската партија, ДОМ, БЕСА, делумно и со ДУИ.
„Јас би му подарил еден ваков календар, затоа што на него може да изброи веќе 52 месеци, веќе петта година е власт во Македонија, а од овде, во Радовиш, му порачувам дека уште малку му остана апсолутна власт, а време е да си замине, затоа што на нивните митинзи нема да слушнете ниту збор за изминативе 52 месеци, затоа што се што ветија излажаа“, рече Мицкоски.
СДСМ
Претседателот на Социјалдемократскиот сојуз на Македонија, Зоран Заев денеска на средбата со жителите на општина Демир Капија го најави Интервентниот план за инвестиции – кој е над осум милијарди евра.
„Инвеститорите ги носиме во секој град и секое населено место. За нас нема големи и мали општини, важни и неважни. Се определивме за политики на рамномерен регионален развој и тие ќе овозможат луѓето да се определуваат да живеат и работат во родното место, бидејки ќе имаат избор, ќе имаат шанса да работат“, рече Заев.
Лидерот на СДСМ и премиер Зоран Заев го почна својот говор на митингот на партијата во Кавадарци, обраќајки му се на актуелниот градоначалник на општината, Митко Јанчев.
Митко, крајот е на 17-ти октомври бе брат, што се нервираш, полека. Ќе дојде, еве го, вака. Рекле старите, ако сакаш да имаш добра недела, погрижи се понеделник да ти тргне работата на добро и еве сум понеделнички да ви го донесам најдоброто на вашата општина. Митко, најдоброто за Кавадарци е со Горан Тодоров, додаде Заев во својот говор.
НЕЗАВИСНА ЛИСТА „ПОИНАКУ“
Носителот на листата кандидати за членови на Советот на Општина Битола, Габриела Илиевска потпиша Меморандум за соработка со Здружението за заштита на животните и животната средина „Бибески“. И двете страни согласни дека иако во предизборната кампања акцентот е ставен на изградба на стационар за бездомни животни, борбата треба да се води на повеќе полиња.
ИЗБОРЕН РАПОРТ НА ЦИВИЛ
Селекција од најважните наоди и анализи од мониторингот на ЦИВИЛ, достапни за пошироката јавност, се емитуваат секој ден во 11:15 часот, во живо, на Јутуб каналот на организацијата.
Од ЦИВИЛ информираат дека поради огромниот број кандидати заинтересирани да бидат изборни набљудувачи за организацијата, рокот за испраќањето на одговорите се продолжи. Сите кандидати ќе бидат известени дали нивните апликации се прифатени или не најдоцна до среда, 6 октомври. Веднаш потоа ќе следат информации за тоа како и каде ќе се одржат обуките.
Д. Муратов
