Младите сакаат повеќе можности за да ја водат агендата за климатски промени, сакаат сигурност дека политичките лидери ќе се погрижат економските модели на управување со земјата да бидат што е можно поодржливи, сакаат да се промовира поправањето на работите наместо да се фрлаат и да креираме отпад, сакаат многу повеќе алтернативна енергија генерално и образовен систем кој е фокусиран и ги вклучува климатските промени и да научат што е можно повеќе низ практично искуство.
Ова денеска го изјави претставничка на УНИЦЕФ во земјава Патриција Ди Џовани пред почетокот на Младинскиот климатски самит. УНИЦЕФ, заедно со Амбасадите на Италија, Шведска и Обединетото Кралство го поддржува овој Самит.
Ди Џовани информира дека младите многу се грижат за оваа тема и посочи дека од средбите со младите, дискусиите и разговорите за она што им е важно, климатските проблеми секогаш се меѓу првите три точки заедно со животниот стил и квалитетот на образованието.
-Денеска е можност да се чуе гласот на младите за она што навистина им е важно. Тој глас официјално да го слушнат политичарите, официјалните лица, заедницата, рече Ди Џовани. Додаде дека претходниот месец во Милано имало двајца младински претставници од земјава, а нивните пораки ќе бидат презентирани денес и следниот месец во Глазгов, на Самитот за глобалните климатски промени.
Амбасадорка на Шведска во земјава Кристин Форсгрен Бенгтсон изјави дека образованието на децата почнува од рана возраст, како и развивањето на свеста за овие прашања и токму затоа е важно прашањата за климатските промени да се вклучат уште во најраните фази од образованиот процес.
Таа изрази задоволство што има толку многу млади луѓе кои доаѓаат и се ангажираат, имајќи предвид дека уништувањето на животната средина и климатските промени се најголемите предизвици со кои се соочуваме денес и ова е можност за младите да бидат слушнати и да го искажат своето мислење. Од друга страна, и лицата кои ги прават државните политики да понесат одговорност за нивните чекори и за тоа што го преземаат, а и сите ние како возрасни.
Министерот за животна средина и просторно планирање Насер Нуредини изјави дека никој подобро од младите не ја разбира климатската криза и никој од нив не е позасегнат.
Ние во новиот закон за климатска акција, кој го работиме, ја предвидовме обврска за донесување на климатски аспекти во сите секторски стратегии и планови, меѓу кои и во образованието на исто ниво како и тие за енергетика, земјоделство и така натаму, рече Нуредини.
Претседателот Стево Пендаровски го отвори Младински самит за климатски промени, а во текот на денот учесниците на Самиот ќе дискутираат за климатската акција и улогата на младите и за гласот на младите за климатските промени.
