Градоначалникот на Лондон Садик Кан денеска објави вонредна состојба за да им помогне на болниците во градот да се справат со зголемениот број пациенти со Ковид-19 поради варијантата Омикрон, која брзо се шири.
Како што пренесуваат локалните медиуми, преземањето на овој чекор ќе овозможи поблиска координација меѓу различните владини служби, бидејќи Велика Британија вчера го забележа најголемото дневно зголемување на бројот на нови случаи на Ковид-19 од почетокот на пандемијата.
Кан рече дека хоспитализациите и недостигот на медицински персонал се зголемуваат и додаде дека по консултациите одлучил денеска да прогласи „вонредна состојба“ поради сериозноста на ситуацијата.
„Зголемувањето на бројот на случаи на варијантата Омикрон во нашиот главен град е многу загрижувачко. Омикрон брзо стана доминантен, бројот на нови случаи нагло скокна, а бројот на хоспитализирани повторно расте“, рече градоначалникот.
Лондон регистрираше 65.525 нови случаи на коронавирус во последните седум дена, од кои 26.418 во последните 24 часа.
Холандија ќе воведе божиќен локдаун со цел да се спречи ширењето на Омикрон варијантата на коронавирус.
Сите продавници, освен оние за основни намирници, училиштата, баровите, рестораните и другите јавни места ќе бидат затворени најмалку до средината на јануари.
Премиерот Марк Руте рече дека ограничувањата се „неизбежни“.
Ова се најстрогите мерки што една земја ги воведе досега поради Омикрон.
И другите земји низ Европа ги заоструваат мерките поради брзото ширење на новата варијанта.
Новите правила во Холандија, кои стапуваат на сила од утре, беа објавени по средбата меѓу Владата и здравствените експерти.
Холандскиот национален институт за јавно здравје соопшти дека во земјата се регистрирани повеќе од 2,9 милиони случаи на коронавирус од почетокот на пандемијата и повеќе од 20.000 смртни случаи.
Париз го откажа новогодишниот огномет и другите настани на Елисејските полиња, во согласност со новите владини мерки за спречување на ширењето на Омикрон варијантата на коронавирус, објави телевизијата БФМ.
Францускиот премиер Жан Катекс во петокот ја соопшти одлуката за забрана на големи јавни настани и огномет за новогодишната ноќ и им препорача на жителите, дури и ако се вакцинирани, да направат тест за Ковид-19 пред новогодишните забави.
Катекс денеска изјави дека Омикрон се шири со молскавична брзина и дека најверојатно ќе стане доминантен во Франција до почетокот на следната година.
Франција имаше 58.128 новозаразени во петокот, како и 162 смртни случаи.
