„За јазикот и идентитетот ниту се разговара, ниту преговара, ниту ќе се преговара во иднина“, истакна премиерот Ковачевски во интервју за Националната радиотелевизија, и додаде дека во овој момент постојат само работни документи кои се разменуваат со Република Бугарија, а кои ќе бидат објавени кога ќе бидат конечни и кога ќе биде утврдена конечната рамка која ќе претставува пат до финално решавање на спорот кој го имаме со соседната земја.
Тој потврди дека во однос на самите разговори, ние имаме јасно изградени позиции во Собранието на нашата држава коешто е поддржано од сите политички партии и тие позиции се јасни и за Владата и за Собранието, политичките партии и сите граѓани.
„Нашиот јазик е јасно впишан во Обединетите нации, и исто така јасно впишан во документите на ЕУ“, кажа премиерот Ковачевски.
На прашањето за справувањето со здравствената криза, односно пикот на пандемијата, Премиерот Ковачевски истакна дека постојано е во контакт со министерот за здравство Беким Сали и дека постојано заседава Комисијата за заразни болести.
„Овој нов бран коронавирус кој што е сега мешавина на делта сојот и на омикрон, потврди уште еднаш дека е потребно повисоко ниво на вакцинација и повисоко ниво на придржување кон мерките за заштита, за дистанцирање. Јас никогаш не сум сакал да бидам советник и да делам совети на нашите граѓани, меѓутоа сите светски анализи покажуваат дека таму каде што нивото на вакцинација е повисоко, стапката на заразување е помала, но дури и кога стапката на заразување е поголема, смртноста е помала“, истакна премиерот.
Подвлекувајќи дека никако не е приврзаник на мерки на присила, туку на мерки на советување, учење, прифаќање врз основа на факти, тој додаде дека граѓаните треба да ја прифатат одговорноста за вакцинирање не само поради нив самите, туку и поради луѓето околу нив и целото општество.
„Ова е решение и одговорност на граѓаните и кон индустријата, и трговијата. Бидејќи со поголем број на заболени, невакцинирани, ние имаме и помалку работници во индустријата, трговијата, и тогаш трпи и економијата. Здравствениот систем ни е подготвен да се справи, имаме доволен број на болнички кревети и капацитети“, подвлече премиерот.
„Владата останува на својата заложба за зголемување на минималната плата и затоа идната недела започнува економско-социјалниот дијалог за нејзино ново зголемување. Ако некој бил за зголемување на минималната плата, тогаш тоа биле Владата на СДСМ и да не заборавиме дека минималната плата беше 9.000 денари, сега е над 15 илјади денари“, рече Ковачевски.
„Јас бев еден од поддржувачите кои што сметаат дека треба да се качи платата од 9 до 15 илјади денари бидејќи учествував во правењето на таа економска програма со другите членови на тимот кои што ја правеа во тоа време. Јас исто така бев тој кој што кажа дека минималната плата треба да се зголеми, меѓутоа и тогаш и сега минималната плата треба да се зголеми низ економско-социјален дијалог. Зошто? Бидејќи минималната плата не може да биде еднострана одлука, административна бидејќи тука се засегнати компаниите“, истакна премиерот Ковачевски.
Тој додаде дека Владата постојано креира политики за поддршка на компаниите за да ја одржуваат продуктивноста за да има реален раст на минималната плата.
„Затоа државата им стои на располагање и на работниците и на работодавачите. Веќе во понеделник има закажано состанок помеѓу синдикатот, Заменик-претседателот на Владата задолжен за економски прашања, координација на економските ресори и инвестиции, Министерката за труд и социјална политика и Министерот за информатичко општество и администрација, на којшто ќе се разгледаат сите барања на синдикатот. Потоа веднаш ќе отпочне економско-социјалниот дијалог со стопанските комори и другите претставници на работодавачите. Така беше и минатиот пат, така беше и при воведувањето на недела неработен ден. Што значи дека Владата останува на својата заложба за зголемување на минималната плата“, рече претседателот на Владата Ковачевски во интервјуто за јавниот радиодифузен сервис.
