Имаме потреба од повисоко ниво на медиумска писменост и едуцирање за дезинформациите во нашите основни и средни училишта зашто младата популација е таргетот. Организиран пристап ќе ни овозможи да создаваме генерации кои ќе бидат поотпорни кон лажните вести и оспособени да ги формулираат своите ставови преку критичко размислување засновано врз проверени информации. Потребно е да обезбедиме и подобри услови за професионално и независно работење на медиумите што подразбира имплементација на најдобрите европски практики, порача претседателот Стево Пендаровски.
Во воведно обраќање на конференцијата „Информации против дезинформации: Градење отпорност кон дезинформациски практики во постковид-опкружување во Северна Македонија“, организиран од Евроатлантскиот совет на Северна Македонија, шефот на државата рече дека во време кога изворите на информации се многубројни и социјалните медиуми масовно се користат за комуникација, интернетот од платформа за информирање може многу лесно да стане платформа за дезинформирање, за ширење лажни вести и пропаганда.
Дезинформациите најчесто не се наивни и случајни, посочи тој, туку се производ на планиран и организиран пристап кон одредена тема, ја поларизираат јавната дебата, со цел да се замагли јавната перцепција за битни прашања и да го подигне нивото на конфликтност во општеството, да ја еродира општествената кохезија и преку тоа да влијае на политичките процеси откако ќе ја наруши довербата на граѓаните во демократските институции.
-Намерите најчесто се на долг рок и систематски да се манипулира јавноста со пласирање погрешни информации, полувистини, извртени факти или комплетно фабрикувани вести со крајна цел да послужи за интересите или целите на одредени државни и недржавни ентитети кои имаат свои специфични агенди, рече Пендаровски, кој како пример ги посочи дезинформациите во пандемијата на глобално ниво или т.н. инфодемија кои влијаат на ефикасноста на мерките и политиките за справување со пандемијата, го зголемија колебањето на луѓето во однос на вакцинирањето и поставија сцена за појава на најневеројатни теории на заговор.
Дезинформациите не се изум на 21 век, рече шефот на државата, но дигитализацијата и глобалната поврзаност ја направија употребата на дезинформациите исклучително моќно оружје од арсеналот на хибридните техники на дејствување.
– Дезинформациите може да ја дестабилизираат и самата држава и затоа не случајно развиените демократии нив ги третираат како закана за националната безбедност. Последниве неколку години и ние ги идентификуваме и третираме дезинформациите како една од приоритетните закани по нашата национална безбедност. Потребата за кревање на свесноста за нивното постоење и нивните ефекти го заслужува нашето полно внимание како општество и како држава, истакна Пендаровски.
Посочи и дека нашата држава во пандемијата се справувала со поткопување на довербата на граѓаните во НАТО и ЕУ односно со организирана кампања на дезинформирање чија цел, рече, имала да го сврти јавното мислење наспроти евроатлантските организации со интензивна употреба на квазиаргументи дека тие не и помагаат на Северна Македонија во време на пандемијата.
-Целта на оваа хибридна стратегија беше јасна, граѓаните да почнат да размислуваат за некои други алтернативни организации кои, наводно, би биле многу поподготвени да ни помагаат во секое време, додаде Пендаровски.
Претседателот порача дека зајакнувањето на отпорноста кон дезинформациите е комплексна задача затоа што треба да се изгради системска, но и лична отпорност кон нив, а тоа може да се постигне, рече тој, само со блиска соработка меѓу државните институции, образованието, граѓанските организации и медиумите.
