Државната комисија за спречување на корупцијата (ДКСК) во наредниот период повторно активно да се вклучи околу анализа за самото доделување на спортските ваучери, побара на денешната седница Владимир Георгиев, член на ДКСК, пренесува МИА.
Според него, ризиците од можни злоупотреби на овие финансиски средства од даночно ослободување остануваат и во оваа 2022 година.
Тој информираше дека Антикорупција побарала и од Државниот завод за ревизија оваа година да ги стави во својот план за ревизија и Агенцијата за млади и спорт, што било и одобрено.
Сето тоа, наведе Георгиев, од аспект на немање отчетност на спортските клубови, федерации и спортистите за тоа како ги потрошиле одобрените средства.
Врз основа на иницијативата лани на ДКСК, АМС за оваа година има усвоено унифициран образец – извештај со кој сите корисници на средствата преку ваучери ќе образложат на кој начин ги потрошиле ваучерите.
Централна позиција има т.н. Централна комисија за евалуација на предлог-листите, бидејќи таа ги рангира федерациите, спортските клубови и активните спортисти и како таква ја доставува понатаму до директорот на АМС, каде пак конечно се одлучува кои и колку средства ќе добие од ваучери, изјави меѓу другото Георгиев.
Потсети дека во Националната стратегија на ДКСК за борба против корупција и судир на интереси за периодот 2021-2025 година прв пат е воведен секторот спорт, исто така, како што рече, како ризичен од корупција.
– Во него има повеќе детектирнаи ризици, а еден од тие ризици беше самото финансирање. Дали е добар тој модел на финансирање преку ваучери односно тоа е даночно ослободување согласно Законот за данок на добивка. Минатата година направивме голема анализа и врз основа на тоа дадовме поголем број препораки до надлежни институции, вклучувајќи ја и Агенцијата за млади и спорт, до Министерството за правда, до Владата…., рече тој.
Се осврна и на тоа дека ДКСК има констатирано оти самиот систем на финансирање на спортот преку ваучери и не е најдобриот модел, бидејќи, како што потсети, тогаш детектиравме ризици дека честопати може да се случи компанијата што дава средства од ваучерот, на одреден начин да преговараат и да договараат затоа колку и како би биле дадени средствата.
Државната комисија за спречување на корупцијата (ДКСК) ќе покрене иницијатива за поведување постапка за кривично гонење во Основното јавното обивнителство против поранешниот градоначалник на Општина Гази Баба, Борис Георгиевски и против актуелниот градоначалник на Општина Студеничани Азем Садики.
Како што беше појаснето на денешната седница на Антикорупциската комисија, за екс градоначалникот Георгиевски постојат основи за сомневање во врска со изградбата на катастерска парцела во Општина Маџари на ул. „Перо Наков“ од фирмата „Електроелемент“, односно новиот салон за автомобили на „Волво“, додека основи за сомневање постојат врз основа на Ревизорски извештај, за недомаќинско работење и трошење на средства од Буџетот, како и јавни набавки во општината за градоначалникот Садику.
Нури Бајрами, член на ДКСК, во образложението за случајот со Георгиевски, меѓу другото информира дека одобрението за градење во случајот со „Волво“, во прва фаза е донесена на 17.02.2020 година, а за втора фаза на 30.09.2020 година, а во медиумите, подвлече, на 28.06.2019 година објавена е информација дека свечено е пуштен во употреба новиот салон за автомобили, токму во објектот започнат со градење како дивоградба.
Според Бајрами, по направената целосна проверка, градбата е изведена без одобрение за градба, градоначалникот постапил спротивно на Законот за локална самоуправа, што претставува прекршување на Закон и злоупотреба на службената должност и овластување.
– Оваа пракса покажува дека овластените општински инспектори, како што се поставени под капа на градоначалникот, тој одлучува за нивните права и обврски. Инспекторот бил на мака и тој требало да се изјаснува пред членовите на Советот, бил изложен на мобинг. На последната средба што ја имавме дознавме од актуелните вработени односно тие што присуствуваа на состанокот дека овластениот инспектор ја напуштил работата. Ова е појава една што треба да се третира на наредните дебати, овластените инспектори навистина да можат да постапуваат, изјави Бајрами, член на ДКСК.
Билјана Ивановска, претседател на ДКСК најави дека од оваа седница па натаму Комисијата секогаш ќе обработува по еден извештај на Државниот завод за ревизија и ќе доставува до Јавното обвинителство иницијативи за кривична одговорност за службени лица кои ги прекршиле своите овластувања. Таа појасни дека ваквото постапување на ДКСК е согласно членот 17.8 од Законот за спречување на корупција и судир на интереси.
Ивановска посочи дека во предметот во ревизорскиот извештај направен за финансиските извештаи на Општина Студеничани, на основната сметка за 2020 година.
– Посебно е симптоматично што ДКСК се воздржува од издавање мислења за утврдените состојби во Општина Студеничани. Тоа е состојба што значи дека на ревизорите не им е обезбедена соодветна документација за поткрепување на нивните наоди. Ова е полошо од издавање на негативно мислење, рече Ивановски.
Појасни дека ревизорите не издале мислење, затоа што во 2020 година на сметката на Општина Студеничани биле исплатени средства во вкупен износ од 2,4 милиони денари без соодветна поткрепувачка документација, а вклучуваат поправки и тековно одржување на улици и патишта во износ од 1,9 милиони денари на двајца добавувачи по фактури, а нема прилог дека работите се извршени и одобрени. За поправка на возила се исплатени 205 илјади денари, за што нема работен налог…
– На членовите на Советот на Општина Студеничани и на градоначалникот им се исплатени средства во износ од 908 илјади денари по основ на месечен надоместок за присуство на седници, кои пак воопшто не се одржале, информираше претседателката на ДКСК.
Ивановска меѓу другото посочи дека ваквиот начин на работење не е во согласност со Законот за сметководство на Буџетите и на буџетските корисници, каде прецизно стои дека внесувањето на податоците во длеовните книги се засновува на веродостојни, вистинити и уредни сметководствени документи како доказ за настаната финансиска промена односно трансакција.
Да се покрене иницијатива за поведување постапка за кривично гонење против тројца градоначалници на Општина Демир Хисар, раководителка на Одделението за урбанизам во Општината, како и нејзиниот сопруг, сопственик на трговско друштво „Амбиент“ заради злосторничко здружување, бара Државната комисија за спречување на корупција (ДКСК).
Шемши Салаи, член на ДКСК, образложувајќи го предметот, појасни дека сопругот на раководителката на Одделението за урбанизам Соња Наумовска, закупил простор во сопственост на Општината, а не плаќал закупнина со години, а тоа било толерирано од страна на тројцата поранешни градоначалници Тони Ангеловски, Љупчо Блаженовски и Марјанче Стојановски.
По информациите до кои дошла ДКСК, се констатира дека Соња Наумовска и нејзиниот сопруг Раде Наумовски се стекнале со бесправна корист на средства од над милион и 500 илјади (1.502.498) денари по однос на неплатени закупнини, а поранешните градоначалници на општината не презеле должни мерки за наплата на закупот.
Во пријавата, како што беше посочено на седницата, е наведео и дека геодетските елаборати за утврдување на правен статус на бесправно изградени објекти во Демир Хисар ги изработиле фирми чии сопственици биле во блиски деловни односи со поранешниот градоначалник Тони Ангелески, а постоел и договор меѓу раководителката Наумовска и поранешниот градоначалник Марјанче Стојановски дека таа на негови роднини ќе им помагне при легализација на објектите, а за возврат градоначалникот да не постапува за присилна наплата за закупот.
ДКСК го разгледа и предметот отворен по барање на поранешниот градоначалник на Град Скопје, Петре Шилегов поврзан со набавката на мултифункционалната противпожарна скала. Бидејќи за овој случај Обвинителството за гонење на организиран криминал и корупција има отворено кривичен предмет, ДКСК ја запре постапката по овој предмет.
