По повод обвинувањата изнесени во јавноста од страна на политичката партија ВМРО ДПМНЕ за неработење и непостапување на Државната комисија за спречување на корупцијата, Државната комисија испрати соопштение со кое ги демантира овие обвинувања.
Од ДКСК истакнуваат дека силниот интегритет на институциите е императив за сите развиени демократски општества. Тргнувајќи од тоа Државната комисија за спречување на корупцијата и судир на интересите, апелира да не се користат неосновани напади кон оваа институција која работи во интерес на сите граѓани, заради што е и основана од Собранието на Република Северна Македонија.
Комисијата работи транспарентно и ажурно согласно своите законски надлежности, за што е информирана целокупната јавност. Резултатите од работењето на Комисијата се јавно достапни, но истовремено сведочат за сериозен напредок во борбата против корупцијата и судирот на интересите.
Наместо неаргументирани напади со краткотраен ефект, ги повикуваме сите граѓани, институции, политички партии, организации и слично да ги пријават сите предмети за кои имаат сомневање за сторена корупција и судир на интереси. Покрај тоа, за да имаме поголем напредок како општество, повикуваме на заеднички заложби за поефикасно и поажурно процесирање на предметите кои ДКСК ги поднесува до надлежните институции кои имаат ингеренции за понатамошно постапување.
За Државната комисија за спречување на корупцијата е од големо значење поддршката од сите поддржувачи на борбата против корупцијата и судирот на интересите, бидејќи само со заеднички напори можеме да создадеме поправедно општество, се вели во соопштението.
Предходно, од ВМРО ДПМНЕ ја обвинија Антикорупциската комисија дека извесен период се обидува да направи привид дека нешто работи, а всушност ништо не работи и дека стотици претставки за сериозна корупција и криминал стојат во фиоките на антикорупционерите, само затоа што не и одговараат на власта.
Од опозициската партија ја повикаа ДКСК да биде ажурна антикорупциска комисија, а не заспан заштитник на криминалот.
Д.М.
