Британија ги замрзнува имотите на руските големи фирми во Велика Британија во банкарството и производството на оружје, санкционирајќи уште пет олигарси и го забрани Аерофлот од нејзиниот воздушен простор, изјави премиерот Борис Џонсон, пренесува МИА.
Објавувајќи ги санкциите како одговор на руската инвазија на Украина, британскиот премиер Борис Џонсон нагласи во Парламентот дека Путин „никогаш нема да може да ја исчисти крвта на Украина од неговите раце“.
Британскиот премиер Борис Џонсон го претстави пакетот „остри“ санкции против Русија, насочени кон банки, членовите на потесното опкружување на претседателот Владимир Путин и екстремно богатите Руси со имот во Велика Британија. Западните земји го координираат воведувањето остри санкции против Русија поради инвазијата врз Украина.
„Овој одвратен варварски потфат на Владимир Путин мора да заврши неуспешно“, изјави британскиот премиер во парламентот за време на презентацијата на новите санкции.
Владата најави дека ќе ги замрзне средствата на некои големи руски банки, вклучувајќи ја и државната ВТБ банка, која е втора по големина во Русија, и ќе оневозможи големите руски компании да собираат капитал во Британија.
„Генерално, ќе воведеме замрзнување на имотот на повеќе од 100 нови ентитети и поединци, покрај стотиците што веќе ги објавивме“.
Од распадот на Советскиот Сојуз, финансискиот пазар во Лондон е омилена дестинација за руските компании.
Велика Британија, исто така, ќе воведе закон за ограничување на депозитите што руските граѓани можат да ги чуваат на банкарски сметки. Предвидена е и законска забрана за извоз на широк спектар на високотехнолошки производи во Русија.
Британската влада планира да формира нова единица на Националната агенција за криминал, која треба да ги спречи руските олигарси да ги избегнат санкциите, а ќе бидат воведени санкции и за руските пратеници кои гласаа за признавање на сепаратистичките републики во источна Украина.
