Украинскиот претседател Володимир Зеленски бара поддршка од ЕУ за мировната мисија на ОН во неговата земја додека Унијата одржува итен самит во Брисел.
Зеленски ова го напиша во порака на својот профил на мрежата Телеграм.
Тој повтори и други повици како што се исклучување на Русија од платежната мрежа SWIFT и ембарго против руската нафта и гас.
– Помогнете ѝ на армијата со оружје и муниција, поддржете мировна мисија на ОН!, напиша тој.
– Нашиот народ гине за слободата на Украина и Европа. Долго чекавме на отворената врата. Прашавме за членство во НАТО – не слушнав одговор. Сега ни требаат меѓународни правни гаранции за безбедност, јасна европска перспектива и брза и конкретна акција, напиша Зеленски.
Зеленски: Најмалку 137 Украинци досега загинале во руската офанзива
Најмалку 137 Украинци загинале од почетокот на руската офанзива, изјави денеска украинскиот претседател Володимир Зеленски.
– 137 херои, наши сограѓани ги загубија животите, рече украинскиот лидер во видео порака објавена на социјалните мрежи и на веб-страницата на украинското претседателство.
Зеленски, исто така, рече дека во борбите биле повредени 316 Украинци.
Украинскиот министер за здравство Виктор Љашко претходно соопшти дека најмалку 57 лица загинале во тешки борби откако руските трупи ја нападнаа Украина.
Според него, во нападите се повредени 169 луѓе.
Тој го повика населението да дарува крв и додаде дека пациентите кои не се акутни случаи треба да се третираат како амбулантски пациенти што ќе спречи преоптоварување на болниците.
Украинскиот претседател тврди дека руски диверзантски групи влегле во Киев
Украинскиот претседателот Володимир Зеленски вечерва изјави оти верува дека руски диверзантски групи влегле во украинскиот главен град Киев.
– Според нашите информации, непријателот ме означил како цел број 1, моето семејство како цел број 2. Тие сакаат политички да ја уништат Украина со уништување на шефот на државата. Имаме информации дека непријателски диверзантски групи влегле во Киев, рече тој во видео објавено доцна вечерва.
– Останувам во владиниот кварт заедно со другите, додаде Зеленски.
Зеленски: Целта на овој напад е притисок врз вас граѓани
Претседателот Зеленски утринава изјави дека Русија продолжува со ракетните напади врз Украина, но дека нејзините војници се запрени да напредуваат во повеќето правци.
Во телевизиско обраќање, Зеленски рече дека руските напади биле насочени и кон воени и кон цивилни цели.
– Целта на овој напад е притисок. Притисок врз вас драги граѓани. Притисок врз целото наше општество. Нагласувам: не само врз властите, туку и врз сите Украинци, рече Зеленски.
Тој додаде дека нападот го потсетил на нападот на Киев во 1941 година.
– Ние сами си ја браниме државата. Најмоќните сили во светот гледаат од далеку. Дали вчерашните санкции ја убедија Русија? Слушаме на нашето небо и слушаме во нашата земја дека тоа не е доволно, нагласи Зеленски.
Според него, Русија ќе мора да разговара „порано или подоцна“
Зеленски ја повика ЕУ да воведе построги санкции кон Русија
Украинскиот претседател Володимир Зеленски ја повика ЕУ да воведе построги санкции кон Русија поради нејзината инвазија.
– Сè уште не се исцрпени сите можности за санкции. Притисокот врз Русија мора да се зголеми, објави Зеленски на Твитер по разговорот со шефицата на ЕУ Урсула фон дер Лајен
Д.М.
