По повод Денот на македонското правосудство – 31 март и како дел од проектот „За правда – следење на спроведувањето на Стратегија за реформи во правосудството во 2021 година“ денеска беше организирана конференција за улогата и обврските на одделни правосудни институции во реформскиот процес, пренесува МИА.
Во овој дел обраќање имаше претседателката на Судски совет, Павлина Црвенковска, во врска со сите усвоени документи во изминатите две години, важни за реформите во судството.
– Во текот на 2019-та година беше донесен нов Закон за судски совет, како и измени во Законот за судовите. Овие закони му наложија на Судскиот совет да донесе низа подзаконски акти со цел да се конкретизираат активностите на советот во правец на поажурно постапување, пообјективно оценување на работата на судовите и судиите, а се со крајна цел за побрза, поефикасна и задоволителна правда, што е клучното во враќањето на довербата кај граѓаните, истакна Црвенковска во нејзиното обраќање.
Таа ги спомена и Деловник за работа на Судскиот совет, Методологија за квалитативно оценување на судиите, но и Методологија за оценување на претседателите на судовите. Ја спомена и Стратегијата на човечки ресурси за судска мрежа донесена во 2020 година, но и Методологија со индикатори за утврдување на сложеност на предмети од минатата година.
Во иднина од голема важност за Судскиот совет е имплементацијата на Меотдологијата за утврдување сложеност на предмети за да може да се прави порационален и поспроведлив план за работа на судиите, со што ќе се обезбеди ефикасност, исто така важен сегмент во враќањето на довербата во судството. Во моментов се прават интензивни напори за имплементирање на оваа методологија во АКМИС системот за да можеме и неа дигитално да ја применуваме. Определени се три пилот судови за првична примена на оваа методологија пред да преминеме на нејзина целосна имплементација, заклучи Црвенковска.
Во вториот панел, учесниците на конференцијата дискутираа за потребата од суштински реформи во областите како што се животната средина, постапувањето по случаи на родово-базираното насилство како и говорот и делата од омраза.
Конференцијата се организира со цел да поттикне дебата помеѓу правосудните институции и правните професии од една страна и граѓанските организации од друга, со цел идентификување на дополнителни реформи и мерки, неопходни за враќање на довербата на граѓаните во правосудниот систем во пресрет на отпочнувањето на процесот за изработка на нов стратешки документ за реформи во оваа област.
