ВЕСТ НА ДЕНОТ
19 ученици и двајца наставници загинаа во пукање во основно училиште во Тексас
Вооружен напаѓач уби најмалку 19 деца и двајца возрасни вчера во основното училиште Роб, во руралната тексашка заедница Увалде, западно од Сан Антонио, соопштија официјални лица, во најсмртоносното пукање во американско училиште по масакрот во основното училиште Сенди Хук пред една деценија, пренесува Њу Јорк Тајмс.
Вооружениот напаѓач, кого властите го идентификуваа како 18-годишен маж кој одел во блиското средно училиште, бил вооружен со неколку оружја, соопштија официјални лица, додавајќи дека тој починал на местото на настанот. Засега не е јасно дали пукањето се случило во една или неколку училници. Официјалните лица не ги објавија имињата или возраста на убиените ученици и возрасни.
ИЗЈАВА НА ДЕНОТ
Претседателот на Собранието Талат Џафери денеска изјави дека не чувствува потреба да им се извини на службениците за кажаните зборови што се слушаат на неодамна објавената аудио снимка, пренесува МИА.
-Јас немам објаснување за тоа, во смисла на објаснување. Јас сум претседател на Собранието и со Деловникот на Собранието е пропишана мојата надлежност. Меѓу другите надлежности е да ја следам работата на службата. Покрај тоа треба да создадам услови и предуслови за работа на службата. Ако некој мисли дека службата треба работното време да го помине на улица „Македонија“ претпоствувам дека граѓаните не посакуваат таква служба, ниту во Собранието, ниту во која било институција, рече Џафери на денешната средба со медиумите.
ВОЈНА ВО УКРАИНА
Од почетокот на руската инвазија на Украина, до 24 мај 2022 година, 234 деца загинале, а повеќе од 433 деца се повредени. Нови факти за силување и други форми на сексуално насилство од страна на руските војници против станаа жителите на окупираните територии, вклучувајќи го и регионот Керсон познат. Релевантните информации ги објави Комесарката за човекови права од Врховната Рада, Лиудмила Денисова.
*
Благодарен сум на сите партнери на Украина кои помагаат. Но, нагласувам повторно и повторно: колку подолго трае оваа војна, толку поголема ќе биде цената на заштитата на слободата не само за Украина, туку и за целиот слободен свет. Затоа, испораката на тешко оружје за Украина – MLRS, тенкови, противбродско и друго оружје – е најдобрата инвестиција за одржување на стабилноста во светот и спречување на многу тешки кризи кои Русија сè уште ги планира или веќе ги испровоцира, рече Зеленски во синоќешното видео обраќање.
ФЛЕШ ВЕСТИ
МПЦ Премиерот Димитар Ковачевски оствари средба со поглаварот на Македонската Православна Црква – Охридска Архиепископија, Архиепископот охридски и македонски Г.Г. Стефан, по повод одлуката за стекнување автокефален статус со кој МПЦ-ОА се прифаќа како еднаква со другите сестрински цркви во православната заедница, информираат од владината прес служба.
ПОДДРШКА Претседателот Пендаровски, во разговорот со Кулеба ја реафирмирал целосната поддршка за Украина и украинскиот народ, посочувајќи дека Северна Македонија како членка на НАТО, во рамки на можностите ќе продолжи да пружа воена, хуманитарна и дипломатска помош на Украина со крајна цел прекин на воената агресија, одбрана на демократските вредности и воспоставување на мир.
СРЕДБА Претставници на Шведска и Финска денеска се среќаваат со претставници на турските власти за да разговараат за нивните барања за влез во НАТО.
ЦЕНЗУРА Рускиот Парламент (Дума) вчера го усвои законот со кој обвинителите се овластуваат да затвораат странски медиуми во Москва, доколку се медиуми што доаѓаат од земја која била „непријателска“ кон руските медиуми, откако на некои руски државни медиуми им беше забрането да делуваат во земјите од Западот.
ИНТЕГРАЦИИ Во обраќање на отворањето на панел дискусијата „Патот до Брисел“, што е воведен настан на овогодишниот Преспа форум за дијалог, што од 16 до 18 јуни ќе се одржи во Охрид, Османи истакна дека ширењето на трансатлантскиот и западниот поредок заснован на вредности и принципи е во интерес како, на земјите аспирантки за членство, така и на државите членки, но и во интерес на глобалниот мир и соработка.
ЦИВИЛНИ АКТИВНОСТИ
ЦИВИЛ организира онлајн настан на тема „Циркуларна економија: Потенцијали и предизвици за идните генерации“ на 26 мај 2022 година, со почеток во 12 часот. На настанот ќе говорат лидерката на ДОМ, Маја Морачанин, претставничката на експертската заедница, д-р Ивана Лозановска и претседателот на Цивил, Џабир Дерала.
Што е циркуларна економија, колку е применлива во националните и локалните економии, особено ако се работи за сиромашни земји, колку е можна во контекст на руската агресија врз Украина и други економски, воени, политички и други услови – се само дел од прашањата поврзани со оваа тема, велат организаторите на настанот што е дел од Неделата на циркуларна економија на Западен Балкан која се одржува од 23 до 27 мај низ целиот регион на Западен Балкан.
СЛОБОДНА ЗОНА
Полека, но сигурно, кога е Балканот во прашање, Софија го презема неславниот примат од Белград – што е друга, но динамично променлива и, види чудо, накај можна позитивна приказна во прашање – за компликување на балканската европска интеграција. Заглавени во своите националистички, повремено шовинистички, проруски внатрешно-политички конвулзии, Бугарите пропуштаат важна историска можност конечно да се етаблираат во конструктивен фактор на Балканот во рамките на американските „национални интереси“. Со „проектот Петков“ им се пружи прилика на цивилизиран начин и со „спасен образ“ да ги нормализираат односите со Македонија и своерачно да го откочат понатамошното регионално евро-интегрирање. Наместо да ја видат и добро да ја проценат „пошироката слика“, тие будалесто, со грамажата на интелигенцијата на Каракачанов, прво го елиминираа Заев (и Димитров) од македонската политика, а потоа одбраа да го слават Ванчо Михајлов во Битола. И, најверојатно, бидејќи самите се „забојадисаа“ во аголот, се доведоа во ситуација да го повторат евро-ветото за Македонија во јуни, пишува Сашо Орданоски во колумната „Нокдаун за шовинистичката политика на Софија кон Македонија“.
Што е според моето ќоше на гледање заклучокот за нас. Бугарија е сериозна држава со свое место на меѓународната сцена. Бугарија си го знае своето место и не презема многу ризични чекори. Таа е член на ЕУ а член е и Грција. Зошто тогаш две европски држави не можат да се договорат не пример да се направи спомен куќа на Гоце Делчев во Кукуш или во Баница да се направи меморијал, кога за Бугарија Гоце е толку важен? Такви иницијативи Бугарија не поттикнува зошто си го знае своето место во распоредот на силите и преземените обврски, пишува Војо Маневски во колумнта „Од мое ќоше“.
Д. Муратов
