ЗОРАН ИВАНОВ
Нечесно е, во најмала рака е некоректно, поради емотивни пориви или политикантски манипулации, сеедно, да се извлекуваат цитати од македонските великани како Гоце Делчев и Питу Гули или Блаже Конески и Горан Стефановски и да се ставаат во функција на актуелните полемики на тема за македонските евроинтеграции.
Секое изместување од контекст на нивното време е ненамерна или намерна манипулација во контекст на ова време.
Што тие денес би рекле за францускиот предлог, за рамката и за протоколите, тоа не може никој да го знае. Тоа што знаеме за нив е дека беа и борци и миротворци и родољуби и космополити.
За ЕУ понудата можеби ќе порачаа да се отфрли, да се игнорира.
А можеби ќе повикаа со ум и со срце да влеземе во уште една битка.
Во уште една извесност во која повторно, како и секогаш низ историјата, можеби ќе излеземе и раскрвавени и повредени.
Но, од која ќе излеземе и понапредни и посилни од уште една добиена македонска национална битка. Македонска битка за нас за сега и за натаму.
Во рингот или на трибините, во битка или во публика – изборот е наш!
Текстот е личен став на Авторот. Дозволено е преземање според лиценцата Creative Commons 4.0Creative Commons 4.0.
