ЕУ воведе рестриктивни мерки за дополнителни 54 поединци и 10 ентитети, меѓу кои и Сбербанк и мото клубот „Ноќни волци“, како одговор на тековната неоправдана и неиспровоцирана руска воена агресија против Украина.
„Советот одлучи да воведе рестриктивни мерки за дополнителни 54 поединци и 10 субјекти како одговор на тековната неоправдана и неиспровоцирана руска воена агресија против Украина. Оваа одлука доаѓа како додаток на пакетот санкции „одржување и усогласување“ усвоен од Советот на 21 јули 2022 година“, се вели во соопштението за печатот на Советот на ЕУ.
Како што истакна Жозеп Борел, висок претставник за надворешна политика и безбедност, на списокот со санкции ставени се и Сбербанк и мото клубот „Ноќни волци“
„Ние наведуваме уште една голема руска банка, Сбербанк, и ја спречуваме да врши трансакции надвор од Русија. Додаваме и други поединци вклучени во неиспровоцираната агресија на Русија против Украина, како што се воени претставници, мото клубот „Ноќни волци“ и актери на дезинформации“, прецизира Борел.
Наведените лица вклучуваат високи членови на политичкиот или културниот естаблишмент како што се членовите на Државната и провинциската Дума, локални политичари како градоначалникот на Москва. Наведени се и високи воени водачи и персонал, политичари назначени на украинските територии нападнати од Русија, членови на Ноќните волци, националистички мото-клуб, пропагандисти и водечки бизнисмени.
Во санкционираните субјекти влегуваат Сбербанк, голема финансиска институција, Ноќни волци, компании кои работат во воениот сектор или бродоградежната индустрија или се вклучени во кражба на украинско жито, и различни ентитети кои ширеле про-Кремљ и антиукраинска пропаганда.
Покрај тоа, со оглед на фактот дека сирискиот режим обезбедува поддршка – вклучително и воена поддршка – на неиспровоцираната и неоправдана воена агресија на Русија против Украина, Советот одлучи да наведе и шест лица и еден ентитет вклучени во регрутирањето сириски платеници да се борат во Украина заедно со руските трупи.
Севкупно, рестриктивните мерки на ЕУ во однос на дејствијата што го поткопуваат или загрозуваат територијалниот интегритет, суверенитет и независноста на Украина сега се применуваат на вкупно 1212 поединци и 108 ентитети. Оние кои се назначени се предмет на замрзнување на имотот и на граѓаните и компаниите на ЕУ им е забрането да им даваат средства на располагање. Физичките лица дополнително подлежат на забрана за патување, што им оневозможува влез или транзит низ териториите на ЕУ.
„ЕУ цврсто стои со Украина и ќе продолжи да дава силна поддршка за севкупната економска, воена, социјална и финансиска отпорност на Украина, вклучително и хуманитарна помош“, подвлече Советот.
Релевантните правни акти, вклучувајќи ги и имињата на наведените поединци и субјекти, се објавени во Службениот весник на ЕУ.
Подготви: Д.Мишев
