Украинските власти прават се што е можно нашата земја да добие уште поефикасно и помодерно оружје од странските партнери, изјави украинскиот претседател Володимир Зеленски во синоќешното обраќање пред нацијата.
Зеленски најпрво им се заблагодари на сите наши војници, кои исклучително храбро – и во најжешките точки на фронтот, со едноставно натчовечки напори – го кочат непријателот.
Тој истакна дека руската армија нема да ја промени својата тактика. Окупаторите знаат дека ќе загубат од Украинците во директна борба, тие се инфериорни по вештина и затоа непријателот смета на артилерија и неселективно гранатирање. Тие се обидуваат да уништат се пред себе и да влезат во урнатините. И јас сум им благодарен на сите што, дури и во такви услови, сè уште ги задржуваат окупаторите во Донбас, во регионот Харков, во насока на Миколаев – секаде каде што конфронтацијата е најакутна.
Во текот на оваа недела, вооружените сили на Украина и нашето разузнавање постигнаа моќни резултати во уништувањето на логистиката на руската армија, задните бази на окупаторите. И секој удар на магацините за муниција на непријателот, на нивните командни пунктови, на акумулации на руска опрема ги спасува животите на сите нас, животите на украинската војска и цивилите, нагласи Зеленски.
Тој се заблагодари на партнерите – на сите што ја снабдуваат Украина со потребното оружје.
Конкретно, оваа недела беше одобрен уште еден пакет поддршка од САД, кој вклучува и муниција за системите ХИМАРС. Ви благодарам многу. Сите тие се користат што е можно попрецизно и поповолно за севкупната стратегија на нашата одбрана. Правиме се за да добиеме уште поефикасно и помодерно оружје, потенцираше Зеленски.
Претседателот изрази надеж за можно враќање на поморскиот извоз на украинските земјоделски производи.
Нашите пристаништа на Црното Море повторно работат. И иако се уште е рано да се даваат општи оценки за процесот, сепак можеме да кажеме дека е позитивен и за нашата држава и за сите наши партнери, кажа Зеленски. Сепак, клучниот безбедносен ризик сè уште не е отстранет. Останува заканата од руски провокации и терористички напади. Секој треба да биде свесен за ова, вели Зеленски.
Но, истакна тој, доколку партнерите го исполнат својот дел од заложбата и ја гарантираат безбедноста на снабдувањето, тоа навистина ќе ја реши светската криза со храна.
Зеленски посочи дека не смее да се заборави дека обновувањето на нашиот морски извоз беше овозможено првенствено благодарение на нашите војници – сите оние кои ја бранеа Одеса и го обезбедија ослободувањето на Змискиот остров. Овие се едноставно херои.
Претседателот информираше дека во текот на неделата, можностите за Украина во африкански правец се значително проширени. Истакна дека имало нови контакти со државниот врв и комуникација со новинарите, и оваа работа ќе ја продолжи следната недела – се планира уште една серија преговори.
За жал, нагласи Зеленски, има значително влошување на состојбата околу АЕЦ Запорожје.
Руските терористи станаа првите во светот кои користеа нуклеарна централа за терор. Најголемата во Европа! Ќе го привлечеме вниманието на светот на ова и ќе инсистираме на нови санкции против Русија за создавање таква глобална закана, рече Зеленски.
Тој посочи дека и покрај фактот што руското гранатирање на нуклеарната централа е едно од најопасните злосторства против Украинците и сите Европејци, против правото на живот на секој човек, поради некоја причина нема извештај, па дури и едноставно известување од Амнести интернешнал за тоа. Многу елоквентен молк, што уште еднаш укажува на манипулативната селективност на оваа организација.
Исто така, претседателот соопшти дека оваа недела има нови санкции од Канада и САД. Швајцарија донесе важна одлука во врска со поддршката за седмиот пакет санкции на ЕУ. Општата тенденција за зајакнување на санкциите останува непроменета и ќе продолжи да ја зголемува цената за овој терор, терор врз нашиот народ, за терористичката држава.
Зеленски се заблагодари на сите кои ја развиваат нашата јавна добротворна платформа UNITED24, и на сите амбасадори на оваа платформа – Андриј Шевченко, Елина Свитолинија, Лиев Шрајбер, бендот Imagine Dragons, Демна. Оваа недела беа сумирани тримесечните резултати од работата на платформата UNITED24. Собрани се повеќе од 6 милијарди UAH во придонеси за реконструкција, опрема за болници, за набавка на амбулантни возила – купени се десетици амбулантни возила. Веќе го има првиот хеликоптер купен со средствата собрани од UNITED24. Ќе се користи за спасување на повредените. Беше можно да се привлече помош од повеќе од сто земји.
Тој како една од најважните области за август и септември го посочи спроведувањето на планот за брзо закрепнување. Што треба да се направи на територијата ослободена од непријателот за на луѓето да им се дадат услови за нормален живот и да се подготват за есенската и зимската сезона. Вкупно, 1.060 населени места се веќе ослободени, а за апсолутно мнозинство од нив се потребни значителни реставраторски работи, деминирање и изградба на социјални објекти. И им благодарам на сите наши партнери кои се вклучија во соодветната работа.
Конкретно, нагласи Зеленски, оваа недела делегацијата на Естонија ги посети областите на регионот Житомир, на кои земјата им помага во закрепнувањето. Естонија беше првата во рамките на Планот за брзо закрепнување што избра објекти за финансирање. Работиме со дипломати и компании во сите други области на кои им е потребна поддршка и реставрација.
Подготви: Д.Мишев
