ВЕСТ НА ДЕНОТ
Отворен Балкан денеска покажува што значи интеграција, олеснет пристап, практична примена на политика на отворени врати и на добрососедство. Денеска тука ги поврзуваме нашите економии, отвораме нови пазари и пласмани, обезбедуваме простор за размена на нови идеи, технологии и пристапи за работа, изјави премиерот Димитар Ковачевски, на отворањето на Првиот меѓународен саем за вино, храна и туризам „Винска Визија на Отворен Балкан“ во Белград.
Ковачевски, на отворањето на саемот заедно со премиерот на Албанија Еди Рама и претседателот на Србија Александар Вучиќ, порача дека тука се вкрстуваат винските патишта на Балканот, со тоа што на едно место се пресретнуваат производителите, откупувачите и дестилариите од регионот.
– Македонското вино е со светски познат квалитет. Северна Македонија според последните рангирања е втор најголем извозник на вино во регионот, а 29 најголем извозник на вино во светот. Трета година по ред извозот на вино од нашата држава е во пораст, и во количини и по вредност, изјави Ковачевски.
Македонските винарии минатата година бележат зголемување од 19 проценти на извозот во споредба со 2020 година, а нивниот број е зголемен на 139, со просечно годишни производство од околу 100 милиони литри.
ИЗЈАВА НА ДЕНОТ
– Двата критични двигатели, дијалогот и консензуалното одлучување, чија цел е мирна соработка и одржливост, се настрана. Ова ги парализира средствата на нашите организации и ги заглавува нивните процеси, додавајќи, во исто време, дополнителна неизвесност и непријатност низ регионот на ОБСЕ и пошироко, дури и доведувајќи ја во прашање нашата иднина како организација, истакна министерот за надворешни работи Бујар Османи, во своето излагање пред Постојаниот совет на ОБСЕ во Виена, претставувајќи ги приоритетите на претседавањето на Северна Македонија со организацијата во 2023 година.
ФЛЕШ ВЕСТИ
БЕЗБЕДНОСТ Агенцијата за национална безбедност денеска организираше настан по повод три години од своето основање. Настанот се одржа во присуство на бројни претставници на Владата на Република Северна Македонија, Собранието на Република Северна Македонија, Канцеларијата на Претседателот на Република Северна Македонија, судските институции, јавното обвинителство и други гости и соработници на Агенцијата.
ПОЛИТИКА Видливо е проевропско крило во опозицијата која ќе ги поддржи уставните измени, истакна денеска првиот потпретседател на Владата и министер за политички систем и односи меѓу заедниците Артан Груби по одбележувањето на годишнината од формирањето на Агенцијата за национална безбедност.
ОБРАЗОВАНИЕ За учебниците по новата Концепција има законски постапки, треба да заврши постапката за економски оператор и учениците од прво, второ, четврто и петто одделение да ги добијат учебниците. Дотогаш ќе учат од соодветните материјали што ги подготви Бирото за развој на образованието, рече министерот Јетон Шаќири одговарајќи на новинарско прашање зошто не биле навремени административните процедури во набавката на учебниците.
СУД Уставниот суд на денешната седница ја отфрли иницијативата за поведување постапка за оценување на уставноста на член од Законот за игрите на среќа и за забавните игри.
ВОЈНА ВО УКРАИНА
Украинскиот претседател Володимир Зеленски имаше средба со водачите на армијата, тајните служби, полицијата, по вторпат во неколку дена.
Ќе кажам само едно: сакам да им се заблагодарам, во име на нашата разузнавачка служба, на сите наши луѓе кои силно нè поддржуваат на југот од земјата, особено на Крим, нагласи тој синоќа во своето обраќање до јавноста.
СЛОБОДНА ЗОНА
„Зошто ќе помине одлуката за уставни измени според која Бугарите, Хрватите, Црногорците и веројатно уште една или повеќе етнички заедници ќе бидат внесени во Уставот?
Затоа што тоа е мудра и државничка одлука.
Затоа што нема ниту една здраворазумска причина нашите сограѓанки и сограѓани од други етнички заедници да не бидат дел од Уставот во кој веќе се набројани, покрај македонската, уште шест заедници.
Затоа што на тој начин, македонската држава манифестира највисоко демократско ниво и зрелост.
Затоа што со таа одлука ќе направиме уште еден голем чекор напред, на автопатот кон ЕУ и кон развиениот демократски свет“, пишува Џабир Дерала во колумната „Зошто ќе помине и зошто може да не помине одлуката за уставни измени?“.
„Зошто се поставуваат рокови за извршување на некоја работа? За правилата во светот не знам, ама со сигурност знам зошто се ставаат рокови кај нас. За да се прекршат или поточно да не се заврши работата што со тие рокови е зацртана. За почеток да поставам едно наградно прашање. Можете ли да се сетите на некоја законска обврска која се извршува навреме? И со зголемен мозочен напор не можам да се сетам на таков пример, а вие?“, пишува Војо Маневски во колумната „Тесно време“.
Ако некакво „мислење” фрлено на јавната сцена ги измрзлавува и ги заглупавува луѓето за проценување, истражување, консеквентно МИСЛЕЊЕ во смисла процесирање, разбирање и барем обид за решавање, или ги тера да се вртат во маѓосан круг во главата или, пак, дури и отворено им промовира дезинформација преку некаков авторитет, тогаш тоа не е мислење. Тоа е манипулација. Тоа во принцип и е напишано и во конвенцијата за човекови права, кај слобода на говорот, пишува Емилија Целаковска во колумната „Колку пати ќе умира Волтер?“.
Д. Муратов
