ВЕСТ НА ДЕНОТ:
Во Скопје се отвори „Алејата на Украина“
Денес во Скопје, свечено се отвори „Алеја на Украина“ на улица Никола Кљусев, на која беше организирана изложбата на фотографии која го демонстрира уништеното културно наследство на Украина.
На отварањето се обратија Градоначалникот на Општина Центар, Горан Герасимовски, Амбасадорката на Украина, Лариса Дир и Претседателот на Здружението на Украинците „Лесја Украинка“, Олександр Урбанович.
ИЗЈАВА НА ДЕНОТ
Украинската амбасадорка Дир на отворањето на „Алејата на Украина“: Вие сте наши сигурни пријатели и сојузници, ние заедно со вас се бориме за демократската иднина на светот
„Војната веќе одзема многу животи од нашата држава, животи на деца, војници, волонтери, цивили,… Украина продолжува херојски да го брани не само сопствениот територијален интегритет и суверенитет. Украина, украинските војници и обичните луѓе во Украина ги бранат европските и универзалните човечки вредности по цена на сопствениот живот“, истакна Амбасадорката на Украина во Северна Македонија, Лариса Дир, при отворањето на „Алејата на Украина“ во Скопје.
ФЛЕШ ВЕСТИ
ИНТЕГРАЦИИ Целосната и забрзана интеграција на земјите од Западен Балкан во ЕУ, е од исклучителна важност за Европа, објави на Фејсбук претседателот Стево Пендаровски, кој учествува на состанокот на лидерите на државите од Процесот Брдо-Бриони.
ПРОТЕСТ Системското игнорирање на општина Шуто Оризари од страна на Советот и раководството на Град Скопје не поминува незабележано од граѓаните. Токму затоа денеска граѓаните на Шуто Оризари поддржани од Ромската заедница од сите Скопски општини, на денот на општина Шуто Оризари (12 септември), во 19:00 часот заеднички пред Град Скопје ќе го постават прашањето „Шуто Оризари – заборавена општина. До кога?“.
ПОЛИТИКА Градоначалничката на Град Скопје, Данела Арсовска ги разреши од функциите секретарот на Град Скопје Ѓоко Велковски и в.д. директорот на ЈП „Водовод и канализација“ Златко Перински, кадри на ВМРО ДПМНЕ.
СУДСТВО Членовите на собраниска Комисија за прашања на изборите и именувањата на денешната седница не дадоа поддршка универзитетскиот професор Саво Климовски да биде избран за уставен судија, како предлог на опозицијата, пренесува МИА.
ПРАВДА Нови барања за екстрадиција на поранешниот премиер Никола Груевски, кој е осуден и обвинет за неколку случаи, а престојува како азилант во Унгарија, како и за Африм Исмаиловиќ и Алил Демири, осудени на доживотен затвор за случајот „Монструм“, кои се во бегство во Косово, најавуваат од Министерството за правда.
ВОЈНА ВО УКРАИНА
Во регионот на Доњецк, руските војници во последните 24 часа убиле тројца цивили, а раниле уште осум други, објави на Телеграм Павло Кириленко, шефот на регионалната воена управа на Доњецк, пренесува Укринформ.
*
Украинскиот претседател Володимир Зеленски во интервју за Си-Ен-Ен изјави дека е изненаден од тоа колку поранешниот претседател на САД, Доналд Трамп продолжил да го фали својот руски колега Владимир Путин, дури и откако Москва ја нападна Украина.
„Верувам дека имаше доволно време, и повеќе, да разбере кој е Путин“, вели Зеленски во интервјуто.
*
Украинските одбранбени сили во изминатите 24 часа успеаја да ги избркаат руските војници од повеќе од 20 населени места, соопшти Генералштабот на вооружените сили на Украина преку објава на Фејсбук, пренесува Укринформ.
ЦИВИЛНИ АКТИВНОСТИ
ЦИВИЛ ќе одржи панел дискусија на која ќе се отвори прашањето за постојаната дискриминација на општина Шуто Оризари од страна на институциите, на 13 септември (утре), со почеток во 11 часот, во ЦИВИЛ прес студиото кај бизнис центарот Палома Бјанка.
Тема на панелот ќе биде денешниот протест на жителите на Шуто Оризари, кој ќе се одржи во 18 часот пред Град Скопје, на кој граѓаните ќе го изразат своето незадовослтво од системското игнорирање на општина Шуто Оризари од страна на Советот и раководството на Град Скопје.
СЛОБОДНА ЗОНА
Европа ја издржа пандемијата. Се прилагодува на климатските промени. Ќе ја издржи и „долгата студена зима“ со која се заканува Путин. Во Германија забрзано се градат капацитети со монументални димензии за трансформација на енергетските капацитети. Истото се случува во голем дел од големите демократии. НАТО се проширува и зајакнува. Пропагандата на Путин покажува сѐ послаби резултати (освен на Балканот).
Затоа, кратковида е заканата со зимата. Зимата ќе биде долга и студена и за Путин. За него зимата започна многу порано отколку онаа со која тој самиот се заканува. Впрочем , украинската офанзива е и почеток на зимата за Путин и неговиот рашистички режим, пишува Џабир Дерала во ЕДИТОРИЛАЈОТ „Winter is coming“.
Д. Муратов
